Kulis.az Sevinc Elsevər Zəhraya həsr etdiyi şeiri təqdim edir.
Beş iyul, 2017
fizioterapiyaya başladım bu gün
ağrılardan qurtulmaq
sağalmaq və çox yaşamaq eşqiylə
ötən gecə
düşmən əliylə öldürülən
iki yaşlı Zəhradan utanmadan həm də...
Zəhranın vurulduğu günü
səhər süfrəsində
təpindi uşaqlarına analar
əllərindəki dürməyi yarımçıq qoymasınlar deyə
günorta süfrəsində də, nahar süfrəsində də elə...
tərlədilər
kürəklərinə dəsmal qoydular
hava küləkliydi Bakıda
uşaqlar çərpələng uçurtdular...
axşamdan noxud islatdı mətbəx qadınları
səhər bişirəcəkləri yeməyə qatmağa
gecə düşdü
kişilər tələsdi yatmağa
səhər işə gecikməsinlər deyə
Zəhranı danışdılar qurtardılar
işığı söndü adamların bir-bir
pəncərələrdə
sosial şəbəkələrdə
bəbəklərdə
ürəklərdə
Bizi Telegram-da izləyin
t.me/kulis_az
Bizi Instagram-da izləyin
Bizi Facebook-da izləyin
Bizi Twitter-da izləyin
