“Mənim o yerlərə dönməyim gəlir” - Əkrəm Əylisli - 79

“Mənim o yerlərə dönməyim gəlir” - <span style="color:red;">Əkrəm Əylisli - 79
6 dekabr 2016
# 12:04

Bu gün Əkrəm Əylislinin 79 yaşı tamam olur. Kulis.Az bu münasibətlə Əkrəm Əylislinin “Mənim o yerlərə dönməyim gəlir” şeirini təqdim edir.

Mənim o yerlərə dönməyim gəlir

(60 yaşıma 13 bayatı)

Mənim o yerlərə dönməyim gəlir

Allah, yol ver gedim, əhd eyləmişəm

Bu yolu bir dəfə geri dönməyə

Bəlkə milyon dəfə cəhd eyləmişəm.

Daha səbr etməyə halım qalmayıb

Daha yol getməyə yolum qalmayıb

Bəsdir, çox demişəm qalım-qalmayım? -

Mənim o yerlərə dönməyim gəlir.

Daş dibindən baş qaldıran göy otdum,

İşıq gördüm – bir balaca boy atdım.

Elə billəm – gəldim, gəzdim, qayıtdım

Mənim o yerlərə dönməyim gəlir.

Elə billəm bu da bir pis yuxuydu:

Düşmənlərim dostlarımdan çoxuydu.

Qoy desinlər: heç əvvəldən yoxuydu –

Mənim o yerlərə dönməyim gəlir

Gəldim, bu şəhərin hər üzün gördüm,

"Domsovet"in gördüm, dənizin gördüm.

Anarın, Mövludun, Ramizin gördüm...

Mənim o yerlərə dönməyim gəlir.

Bu da bir yol idi – tutub gedirdim:

Dünya ilə cəngi-cida edirdim.

Heç bilmədim – nə tapdım, nə itirdim.

Mənim o yerlərə dönməyim gəlir.

Heç bilmədim necə oldu böyürdən

Şeytan çıxdı, insan düşdü dəyərdən.

Şairləri şər qaynadan bu yerdən

Mənim o yerlərə dönməyim gəlir.

Gəldim – bu dünyanın məğzini gördüm.

Naşəxsini gördüm, şəxsini gördüm.

Şeytanın min cürə rəqsini gördüm.

Mənim o yerlərə dönməyim gəlir.

Əyyaşların hacılığın da gördüm,

Dəyyusların ucalığın da gördüm.

Dostları da dar gündə cında gördüm,

Mənim o yerlərə dönməyim gəlir.

Gözüm baxa-baxa soyundu dünya:

Gördüm ki, bir miskin oyundu dünya

İndi bir hava çal – toyumdu, dünya!

Mənim o yerlərə dönməyim gəlir.

Mənə əl eləyir əli Əylisin,

Yağışı-yağmuru, seli Əylisin

İliyimdə əsir yeli Əylisin –

Mənim o yerlərə dönməyim gəlir.

Mənim o yerlərə dönməyim gəlir,

Kaş ki, bu gedişlə qalaydım, Allah

Yorğun ürəyimə bir ağac altda

Oturub bir layla çalaydım, Allah.

Allah, dinlə məni, dinməyim gəlir

Yandığım bəsimdir, sönməyim gəlir

Məni qaldırdığın o pilləkənlə

Sənin hüzuruna enməyim gəlir

Mənim o yerlərə dönməyim gəlir.

Mənim o yerlərə dönməyim gəlir

Allah, yol ver gedim, əhd eyləmişəm

Bu yolu bir dəfə geri dönməyə

Bəlkə milyon dəfə cəhd eyləmişəm

Daha səbr etməyə halım qalmayıb

Daha yol getməyə yolum qalmayıb

Bəsdir, çox demişəm qalım-qalmayım

Mənim o yerlərə dönməyim gəlir.

Fevral, 1997-ci il.

# 1946 dəfə oxunub

Oxşar xəbərlər

Sakura ətirli məhəbbət romanı - Yunis Orucov

Sakura ətirli məhəbbət romanı - Yunis Orucov

17:45 12 sentyabr 2025
"Həmid Herisçi elə bilir ki, AYB-yə üzv olursansa..." - Orxan Həsəni

"Həmid Herisçi elə bilir ki, AYB-yə üzv olursansa..." - Orxan Həsəni

09:00 11 sentyabr 2025
“Ədəbi kruq”lar üslub rəngarəngliyinin və ideya zənginliyinin qarşısını alır - Anar Şamil

“Ədəbi kruq”lar üslub rəngarəngliyinin və ideya zənginliyinin qarşısını alır - Anar Şamil

10:00 6 sentyabr 2025
Başlanğıcdan sona sehrli Borxes gerçəkliyi...- Sevinc Mürvətqızı

Başlanğıcdan sona sehrli Borxes gerçəkliyi...- Sevinc Mürvətqızı

10:00 24 avqust 2025
"Bomboz həyat bağrımı çatladacaq..." -   “Tütək səsi”nin Cəbrayıl rolunu  niyə Şahmar Ələkbərova vermədilər?

"Bomboz həyat bağrımı çatladacaq..." - “Tütək səsi”nin Cəbrayıl rolunu niyə Şahmar Ələkbərova vermədilər?

10:00 23 avqust 2025
Ayxan Ayvazın "Banan qabığı" hekayəsinin psixopoetik yozumu: Selincer podteksti - Mətanət Vahid

Ayxan Ayvazın "Banan qabığı" hekayəsinin psixopoetik yozumu: Selincer podteksti - Mətanət Vahid

15:00 12 avqust 2025
Ana səhifə Yazarlar Bütün xəbərlər