"Ulan Mövlud" demək varmış – Elvindən YENİ ŞEİRLƏR

"Ulan Mövlud" demək varmış – Elvindən <span style="color:red;">YENİ ŞEİRLƏR
23 iyun 2017
# 11:49

Kulis.az Elvin Bakiroğlunun yeni şeirlərini təqdim edir.

Metamorfoz

hamısı öz yerindədi,

baxır hardan baxırsan da.

yeni sevgilər doğulur

ayrılığın arxasında.

adama gülməli gələn

unutmağın sürətidi.

bu da yaşamaqdan ötrü

ömür - yol hərəkətidi.

üzmə dünyadan əlini,

sevin ki adamsan hələ.

yarın yoxa çıxsa belə

görürsən ki tamsan hələ.

bir adamın gələcəyi

başqasının keçmişidir.

sən öpdüyün əllər indi

kiməsə yemək bişirir...

Dırnaqarası şeir

dünya necə yerdi ki

bir qadın körpəsini zibil yeşiyinə bağışlayıb deyir:

“necə baxırsan bax”

yaxşı ki

fikir oxuyan cihaz kəşf olunmadı

ertəsi gün sevgi ölərdi

ot da bitməz sevginin öldüyü yerdə

eyni kabusu görər -

otların yuxusuna hər gün ac quzu girər

bir də görərsən

bir aşbazın qovulma səbəbi bir milçəyin intiharıdı

bir gəncin intiharı hamının ölümüdü

çünki bir gəncin intihar məktubunda belə yazılıb:

“hamınızı öldürməyə gedirəm”

sonra bir evi sökərlər – bir küçənin dişi çəkilər

o küçədən bir qadın köçüb gedər

o qadının yolundan bir kişi çəkilər

deyərlər ki:

“ölümün ayıra bilmədiyi cütlüyü həyat ayırdı

onlar ayrılığı istəmirdilər

ayrılıq onları arzulayırdı”

dünyanın ən uzun ölçüsüdü “ehtiyacın əlləri”

və ən böyük yeridi “keçmiş sevgililər qəbristanlığı”

dünya da belə yerdi -

ölü ürəklər döyünür qəbir evlərdə

məsələn belə də olur

cavan oğlan anasını qocalar evinə qoyub tapşırır:

“yaxşı baxın, elə bilməyin yiyəsizdi.”

Mövluda

sənin gülən gözlərinə

baxıb gülümsəmək varmış.

"ulan Rza"nın yerinə

"ulan Mövlud" demək varmış.

artdı yoxa bürünənim,

göy üzündə görünənim.

ömür boyu sürünənin

içində kəpənək varmış.

ötən günəm, ötən çağam,

hər gün sınan oyuncağam.

sən ölmüsən, mənsə sağam,

məndə də nə ürək varmış...

# 2684 dəfə oxunub

Oxşar xəbərlər

"Baxır, sən o xəzinədən nə "çırpışdıra" biləcəksən..." - 21-ci əsrin ən yaxşı Azərbaycan romanları

"Baxır, sən o xəzinədən nə "çırpışdıra" biləcəksən..." - 21-ci əsrin ən yaxşı Azərbaycan romanları

14:00 18 sentyabr 2025
Sakura ətirli məhəbbət romanı - Yunis Orucov

Sakura ətirli məhəbbət romanı - Yunis Orucov

17:45 12 sentyabr 2025
Həmid Herisçi elə bilir ki, AYB-yə üzv olursansa...

Həmid Herisçi elə bilir ki, AYB-yə üzv olursansa...

09:00 11 sentyabr 2025
“Ədəbi kruq”lar üslub rəngarəngliyinin və ideya zənginliyinin qarşısını alır - Anar Şamil

“Ədəbi kruq”lar üslub rəngarəngliyinin və ideya zənginliyinin qarşısını alır - Anar Şamil

10:00 6 sentyabr 2025
Başlanğıcdan sona sehrli Borxes gerçəkliyi...- Sevinc Mürvətqızı

Başlanğıcdan sona sehrli Borxes gerçəkliyi...- Sevinc Mürvətqızı

10:00 24 avqust 2025
"Bomboz həyat bağrımı çatladacaq..." -   “Tütək səsi”nin Cəbrayıl rolunu  niyə Şahmar Ələkbərova vermədilər?

"Bomboz həyat bağrımı çatladacaq..." - “Tütək səsi”nin Cəbrayıl rolunu niyə Şahmar Ələkbərova vermədilər?

10:00 23 avqust 2025
#
#
Ana səhifə Yazarlar Bütün xəbərlər