Kulis.az istedadlı şairə Sevinc Elsevərin yeni şeirlərini təqdim edir.

***

bircə

xoşbəxt adamlar üçün

xoşbəxt evlər tikən

işçilərin əynində

əsgərlikdən gətirdikləri

hərbi paltarları görəndə

batmıram qəmə

müharibədən xəbər vermirlər onlar

evləri dağıtmırlar

evləri qururlar...

***

xırda dibçəkdən

iri dibçəyə köçürdü

boy atan çiçəyini qadın

dibçəyin dibindən çıxan soxulcanları isə

akvariumdakı balıqlarına atdı

bəlkə balıqçılardan qaçıb gizlənmişdilər

dəryadakı balıqlara yem olmaq istəmirdilər

qarmaqların ucunda

taledən qaça bilmədilər sonucda.

Siçan qız

gecələr yuvasından çıxıb

kitabları gəmirən

siçan kimi

gizlicə yanaşır kitab şkafına

daşıyır yatağına

qadağan olunan kitabları

qaranlıqda oxuyur qızcığaz

tərgidib daha

gəlinciyini qucaqlayıb yatmağı

kitablarla yatır hər axşam

cəzalanır kitabı

balışının altında unudanda

səhər oğurluq üstündə tutulanda

öyrənmək istəyir o kitablardan

böyüklərin nə sirlər gizlədiyini

həyata dair

insana dair

eşqə dair

***

hər gecə kəlmeyi-şəhadətini

söyləyib yatan yaşlı qadın

günün günorta çağı öldü qəfil

kəlmeyi-şəhadətini deməyə imkan tapmadan

***

körpəsinin qırxılan saçları

bərbərin ayaqları altında qaldıqca

narahat olur kişi

amma bir söz də deyə bilmir bərbərə

saçlara görə...

***

tökülən süd dişlərinin yerinə

o saat yenisinin çıxmamağından

şikayətlənir balaca

laxlayan süd dişini bərk-bərk

qoruyur ağzında

təzə dişi görməyincə

köhnəni vermək istəmir...

***

zamanı o qədər dəyərləndirirdi

darıxanda kiminsə

lap elə ən yaxın dostun üstünə qaçmağı

pula möhtac olanda

pul axtarmaq kimi bilirdi artıq

***

körpəsinin bədəninə

qırmızı xalları

hansı ağcaqanadın qoyduğunu

təxmin eləyən qadın

digərlərindən daha böyük qəddarlıqla

öldürür onu

***

böyük ürəyi olmalı

köynəyinin yaxasında

özündən daha gözəl qadının

şəklini gəzdirən xanımların

***

kişilər qoyun kəsir

qadınlar və uşaqlar

qoyun şəkilli tort

qurban bayramlarında

Rüzgarla xəyanət

elektrik sayğacının

çox pul yazmağına deyindi

qadının qənaətcil əri

bütün günü

ona elə gəlirdi

bahalığa görə suçlanası tək adam

evinin xanımıydı

başqa heç kimi günahlandırmaq

ya ağlına gəlmirdi

ya çox qorxaq idi

rüzgarı səslədi qadın

söndürüb sərinkeşi

möhtac hiss etməsin

minnət duymasın deyə

pəncərələri açdı taybatay

göz yaşını içinə axıtdı

uşaq kimi küsdü Tanrıdan

onu qadın yaratdı

rüzgar gəldi axşamüstü

yellədi pərdələri

zivədəki paltarları

pəncərədəki qadının

alnına tökülən saçlarını

köynəyinin yaxalığından

içəri doldu

qadını yanğınların içindən aldı

qadın təslim elədi özünü

rüzgarın qollarına

bu dünyada ən xeyirxah

ən duyğulu

əliaçıq sevgiliydi o.

Cehiz

nəvəsinə cehiz verməkdən ötrü

təqaüd kartıyla

bankdan kredit almaq istəyən

77 yaşlı qocaya

pul vermədi bank işçisi

“ömrünə vəfa yoxdu sənin ” - deyərək üzünə

biganə və sərt

“mən hələ heç yana tələsmirəm,

hələ ölmürəm, bala ”- dedi qoca

gözləri dola-dola

üç gün sonra

qəza keçirdi bank işçisi

qoca gecə xəbərlərində

izlədi onun

üzünə qəzet vərəqləri örtülmüş cəsədini

amma bu nə təsəlli idi qocaya

nə azaldırdı qəmini

əksinə dərdinin üstünə dərd gəldi

“üç gün əvvəl danışırdı mənimlə

indi ölüdü” - deyə köks ötürdü

nəvəsinə cehiz düzəltmək üçün

axtardığı pulu düşündü

köhnə evinə göz gəzdirdi

satmalı nə qaldı deyə

***

bayaqdan parkda oynayıb tərləyən uşaqlarının

üzündəki, kürəyindəki, boynundakı təri siləndə

az əvvəl əlindəki məndilləri

satan balaca oğlan uşağının da

alnından, üzündən qan tər axdığını xatırladı

Kaktus gülü

Pərdənin arxasında unutduğun

Kaktus gülünə

Toxunmaq kimidi

Yenidən eşqə düşmək

Sən pərdəni çəkmək

Nə zamandı qaranlıqda qalan otağını

Aydınlatmaq istərsən

Kaktus gülünü ovuclar barmaqların

Acılar içindən keçərək

Qovuşarsan gün işığına...

Sonra... sonra

Yenə qaranlıq çökər

Sən kaktus gülünü unudarsan pərdə dalında

• “Küçə sənətçiləri” layihəsinin qalibləri məlum oldu
• İstanbulda "Müasir Azərbaycan hekayəçiliyi və romançılığı" mövzusunda panel keçirildi
• Azərbaycan Dövlət Gənc Tamaşaçılar Teatrının noyabr repertuarı