Kulis.Az Zahid Sarıtorpaqın Vaqif Bayatlı Odərə həsr etdiyi “Unudulur” şeirini təqdim edir.
unudulur
ana südünün dadı kimi yaddan çıxır
qanımıza yeriyən sevgilər
bələkdəki körpələr
gündə bir yol da olsa
qanadsız doğulduqlarına ağlayırlar
ağlayırlar torpağa düşənəcən
deyirlər
atlar heç vaxt dərdli gözlərini qaldırıb
göy üzünə baxmırlar
amma ölümqabağı
uzun-uzadı baxırlar mavi dərinliklərə
baxırlar torpağa çökənəcən
bəzən bir qara-qorxu kimi
doldurur ruhumuzu
dünyanı qəfildən tanımaq qəmi
hər şeyi bilincə
qanı damarında qərib olur
sevgisi qanında qərib olur
sevdiyi sevgisində qərib olur adamın
deyirlər qayıdacağıq
qayıdacağıq atıb getdiklərimizə
sevib unutduqlarımıza
unudub ötdüklərimizə
Vida Günü
torpaq əvəzinə
mavi sonsuzluqlara yıxılacağıq
üzüquylu
qayıdacağıq deyirlər
qanımıza yeriyən sevgilər
ana südünün dadı kimi yaddan çıxır
bəlkə də qayıdacağıq
dördəlli tutun torpağı
1984
Bizi Telegram-da izləyin
t.me/kulis_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
Ana səhifə
Reels
Yazarlar
Xəbərlər