Azərbaycan Yazıçılar Birliyinin mətbuat katibi Ədalət Əsgəroğlu yazıçılara ev veriləcək binanın tikintisi ilə məşğul olan “Abidə” MTK-nın rəhbəri Arif Mədətovun söylədiyi fikirlərə münasibət bildirib.

Ədalət Əsgəroğlu deyib ki, Arif Mədətovun psixoloji problemləri var: “Mən bütün mətbuat işçilərindən xahiş etmişdim ki, bu mövzu ilə bağlı Arifin yanına gedəndə özünüzlə psixoloq da aparın. Bu adamın psixoloji vəziyyəti qənaətbəxş deyil. Allah şəfa versin, o, həqiqətən də xəstədir. Xəstəliyindən xəbərim var, amma Arifin elədiyi qeyri-ciddi söhbətlər istər-istəməz məni vadar edir ki, ona cavab verim. O, özünü elə aparır ki, guya oranın yiyəsidir. Əslində isə maaşa baxır, icraçıdır, oranın sahibi başqa adamdır. 2003-cü ildən Arif Yazıçılar Birliyinə ayaq döyüb, rəhbərlikdən xahiş edib ki, o torpağı almaqda kömək etsinlər. Deyib ki, sizə köməkliyim dəyəcək, çünki sizdə ev növbəsi var. Bundan sonra Anar müəllim yuxarı təşkilatlara müraciət etdi və şəhər meriyası sərəncam verdi. Özünüz bilirsiniz ki, sərəncamın alınması asan məsələ deyil. Sərəncam verilməsi üçün biz yazıçılar qol çəkdik, mərhum xalq şairi Qabil dəfələrlə Hacıbalaya danışdı. Hətta prezident səviyyəsində söhbət oldu. Sərəncam o şərtlə alındı ki, şirkət AYB ilə müqavilə bağlasın, bizə 1000 kvadrat metrə yaxın mənzil verilsin”.

Ədalət Əsgəroğlu bildirib ki, hazırda acınacaqlı vəziyyət yaranıb: “Növbəyə duranlar, orda payı olanlar bu söhbətdə acizdirlər. Kim bir müştəri tapıb evə baxmağa gedirsə, Arif onların qabağını kəsir və deyir ki, bura 50 ilə hazır olan deyil. Müştəriləri geri qaytarır. Bunu ona görə edir ki, biz mənzillərin kvadrat metrini 600 manatdan ona satmaq məcburiyyətində qalaq. Ona görə də növbədə olan adamlar bu gün yığışdılar, Arifə çox yaxşı bir dərs vermək istəyirlər, o dərsi də verəcəklər. Bu tale məsələsidir. Hər bir yazıçının arxasında ailə dayanır. Və bu ailənin yaşayışına mane olmaq insafdan deyil”.

• 14 yaşlı şagirdlər niyə çantasında bıçaq gəzdirir? - Məktəblərimizin faciəvi vəziyyəti
• "Əgər xoşbəxtlik deyilən bir şey varsa..." - Sürgündə yazan italyan yazıçı Natalia Ginzburq kim idi?
• Bir dəstə qızılgül - Yeni hekayə