Kulis.az yeni layihəyə başlayır. “Oxucu” adlı bu layihədə oxucular ədəbiyyatla bağlı suallarımızı cavablandıracaqlar.

- Əvvəlcə özünüz haqda məlumat verin, mümkünsə...

- Şəbnəm Əzizova. 26 yaş. İxtisasım fransız dili... Əksəriyyət kimi tamam fərqli sferada çalışıram.

- Kitabla necə tanış oldunuz?

- Ağlım kəsəndən evdə kitabların içində olmuşam. Babamın kiçik kitabxanası vardı. Oxumağa kiril əlifbasıyla başlamışam. 6 yaşım olanda bibim qızlarıyla birlikdə kitabxanaya üzv olmuşdum artıq. Belə başladı...

- Klassikləri oxumaqla müasirləri oxumaq arasındakı fərq nədir?

- Məncə fərq ondan ibarətdir ki, klassik müəlliflərin əsərlərində bütün məsələlərin həlli mənəvi müstəvidə həll olunurdu. Zamanın da təsiri var məsələyə. Həyat o vaxtlar bu qədər sürətli deyildi. Daha çox düşünürdü insanlar. İndiki zəmanədə hər şey çox sürətlə dəyişir, bu, öz təsirini ədəbiyyata da göstərir. Günümüzün romanları daha dinamik, daha praktikdir. Hər hansı problemin həllini göstərmək üçün mənəviyyat, düşüncə üzərindən yox, məhz dinamik hadisələr üzərindən, yığcam şəkildə məqsədə doğru gedilir. Martin Paj, məncə, buna ən yaxşı sübutdur. Balaca bir kitab, dinamik hadisələr və məsələnin praktik, dəqiq həlli... Hər xalqın bugünü keçmişinin, ədəbiyyatının nəticəsidir. Keçmişlə gələcəyi ortaq məxrəcə gətirmək çətindir. Danışdıqca uzanacaq.

- Sizcə, kitabın fərd və cəmiyyət üçün missiyası nədir?

- Kitab həm təhlükəli silah, həm də aydınlanma vasitəsidir. Sadəcə doğru istiqamətə yönəlmək üçün zamanında lazımi insanlarla rastlaşmaq lazımdır. Kimin bəxtinə nə çıxsa... Söhbət kitabın əsas missiyasından gedirsə - insanlığın xilaskarıdır.

- Ən çox sevdiyiniz yazıçılar kimdir?

- Ən çox sevdiyim yazıçı yoxdu, oxuduğum, aydınlandığım müəlliflər var. Remarkın baş qəhrəmanları ilə xarakter oxşarlıqları olduğuna görə, bir az doğmalıq var ona qarşı.

- Daha çox hansı kitabları oxuyursunuz?

- 6 yaşımdan bu yana əlimə nə keçibsə oxumuşam, nağıllardan tutmuş Homerə, Drayzerə qədər... Son iki ildə lazımi insanlarla tanışlığım oxu zövqümün də formalaşmağına kömək etdi. 10 il əvvəl oxuduğum kitabları bir daha oxudum, oxumağa da davam edirəm. Ən önəmlisi fanatizmdən bütünlüklə qurtuldum, yeni müəlliflərlə, müasir Azərbaycan ədəbiyyatı ilə tanış oldum.

- Ən çox sevdiyin 3 roman, 3 hekayə, 3 şeir...

- “Səfillər”, “Üç muşketyor”, “Tatar çölü”. “Poçtmeyster”, “Banan balığının ovlanan günü”, “Küknarlara məktub”. Cemal Süreya – “Üvercinka”, Günel Mövlud – “Yastığımdakı ilan”, Aqşin Yenisey – “Yüz qırx yeddi dənə sən”

• Məhəmməd Füzulinin Qarabağ səfəri - Azad Qaradərəlinin hekayəsi
• Azərbaycan və Özbəkistanın milli teatrları əməkdaşlığa başlayır
• “Tağıyev: Neft” filmi Azərbaycanın Oskar mükafatına rəsmi namizədi seçilib