Yazıçı Varisin əsərinə Rusiyada qadağa qoyulub. Bu barədə Kulis.aza yazıçı özü məlumat verib.

Varisin mayın 18-də Rusiyanın “Proza.ru” portalında dərc edilən, bir azərbaycanlı şəhid anasının real yaşantılarını əks etdirən “Yaş əsgər çəkmələri” hekayəsi ötən gün portalın rəhbərliyi tərəfindən saytdan çıxarılıb.

Yazıçıya göndərilən bildirişdə deyilir: “Sizi məlum edirik ki, “Yaş əsgər çəkmələri” əsəriniz “Proza.ru” serverində dərc edilmək qaydalarına zidd olduğuna, 3.2 maddəsinin tələblərini pozduğuna görə dərcdən çıxarılmışdır. Bu maddəyə görə, Rusiya Federasiyası qanunvericiliyi ilə qadağan edilmiş məzmuna malik əsərlər dərcə buraxılmır”.

Qadağaya səbəb hekayədə işlədilən “İşğalçı erməni silahlı qüvvələri” ifadəsi olub: “Siz “İşğalçı erməni silahlı qüvvələri” söz birləşməsindən istifadə etməklə millətlərarası münaqişəni qızışdırmağı qadağan edən Rusiya qanunvericiliyini pozmusunuz. Bizim müəlliflər tək Rusiya ərazisində deyil, başqa ölkələrdə, o cümlədən də, Ermənistanda yaşadıqlarına görə, sizin nəzər nöqtəniz başqalarının nəzər nöqtələri ilə kardinal dərəcədə fərqlənə bilər.

Bundan başqa, sizin əsəriniz bütün dünyanı əhatə edən oxucu kontingentimiz arasında da fərqli və neqativ reaksiya yarada bilər”.

Yazıçının bildirdiyinə görə “Yaş əsgər çəkmələri” hekayəsinin dərcdən çıxarılması üçün onlarla erməni yazarı, eləcə də yüzlərlə erməni oxucu sayt rəhbərliyinə şikayət edib.

Xatırladaq ki, Varis Beynəlxalq Moskva Ədəbi Mükafatının finalçısı olub. Onun “Sovremenniki i klassiki” seriyasından nəşr edilən “Yanvarın 13 günü” kitabında Qarabağ həqiqətlərinə toxunulur. Dünyanın 23 ölkəsində satışa çıxarılan həmin kitab da ermənilərin kəskin etirazına səbəb olub.

• Rövşən Rzayev vəfat etdi
• Səlim Babullaoğlu: "Həmid Herisçini süngü ilə qarşılayanlar..."
• Rusiyanın Əməkdar artisti intihar etdi