“Gülüstan” romanına görə çoxlu təhdidlər alıram”

Bunu Kulis.aza yazıçı Şərif Ağayar söyləyib. O, eyni zamanda bildirib ki, bu təhdidlər yalnız zəng və xəbər göndərmək səviyyəsindədir, ancaq, reallıqdır.

Ş.Ağayar əvvəllər də belə hallarla qarşılaşdığını söyləyib: “Bir neçə hekayəmə, “Haramı” romanına görə məndən inciyənlər, mənə acıqlananlar, xəbər göndərənlər, zəng edib hədələyənlər olub. Ancaq o qədər də ciddiyə almamışam. Hətta “Haramı”da Koroğluya istehza etdiyim üçün bir dəstə adam məni məhkəməyə vermək istəyirdi. Özümə də zəng vurdular, səbəb isə çox gülməli idi: qardaşımla tutaşmışdılar və düşünürdülər ki, mən ona kömək edirəm.”

Ş.Ağayar təhdid və narazılıqların səbəbləri ilə bağlı da danışaraq bildirib ki, doğulub-böyüdüyü Laçın rayonunun əhalisi, ona yaxın və uzaq olan insanlar yazı-pozuya digər bölgələrdən daha həssas münasibət göstərirlər: “Xüsusən bəzi yaşlılar ərizə və donosla hekayənin, romanın fərqini bilmir. Özlərinə oxşar obraz gördülərmi, elə bilirlər ki, üzərlərinə düşünülmüş hücum var. Bu mənada “Gülüstan” romanı ilə bağlı narazılıq daha çoxdur. Mən etiraf edirəm, prototiplərdən istifadə etmişəm. Kimsə orda özünün, atasının, hətta babasının oxşarını, başına gələn əhvalatı, bənzər faktları görə bilər, ancaq bu o demək deyil ki, həmin adamlardan yazmışam. Çünki heç bir ad, soyad və məkan göstərilməyib. Təsəvvür edin, vəzifəli bir adam mənə xəbər göndərib ki, o, bizim nəsli qurumsaq kimi qələmə verib. İnanırsınız, mən o adamın nəslini tanımıram və kitabdakı hansı nüansdan bəhs etdiyini bilmirəm.”

Yazıçı daha sonra əlavə edib ki, narazılar arasında onun yaxın qohumları da var: “Narahat bölgədir, camaat əsəb və gərginlik içərisindədir. Çoxu onlara zülm edən yerli məmurlara heç nə edə bilmir, günah keçisi axtarır. Təbii ki, məni sevməyən adamlar da bu situasiyadan faydalanmağa çalışırlar. Mən kitab yazarkən, təbii ki, heç kimi alçaltmaq barədə düşünməmişəm. Eşitdiyim, bildiyim əhvalatları, tanıdığım insanları öz bildiyim kimi, öz interpretasiyamda, başqa adda və başqa məkanda yazmışam. Bu tarixi-etnoqrafik əsər deyil, romandır, daha çox təxəyyül məhsuludur. Heç kəs üstünə götürməsin və məni narahat etməsin.”

• Azərbaycanlı müəllifin pyesi Rusiyada beynəlxalq müsabiqənin qalibi oldu
• “İçərişəhər” Dövlət Tarix-Memarlıq Qoruğu haqqında Əsasnamə”yə dəyişiklik edildi
• "Biz bütün səadətimizi dörd gündə yaşadıq..." - "Əcəl zəngi"ndən bir hissə