“Forbes” jurnalı ötən bir ilin ən çox qazanc əldə edən yazıçılarının siyahısını təqdim edib. Kulis.Az xarici informasiya vasitələrinə istinadən xəbər verir ki, ötən 12 ay ərzində ən çox qazanc əldə edən Böyük Britaniya yazıçısı E. L. Ceyms olub.

Azərbaycan dilinə də tərcümə olunmuş məşhur “Bozun əlli çaları” erotik trilogiyasının müəllifinin qazancı 95 milyon dollar təşkil edib. Əsərin belə çox satılmasına səbəb onun elektron kitab şəklində dərci də təsir göstərib. Elektron kitablar erotik roman həvəskarlarına onları rahatlıqla ictimai yerlərdə oxumaq imkanı verir.

Əvvəlki üç ilin reytinq cədvəlinə liderlik etmiş amerikalı yazıçı Ceyms Patterson bu il ikinci yerdə qərarlaşıb. “Forbes”in məlumatına görə məşhur bədii qəhrəman inspektor Aleks Kross haqqında silsilə romanların müəllifi yalnız qısa müddətə siyahıda geriləyib. Növbəti ildə onun yenidən birincilik əldə edəcəyi gözlənilir.

Üçüncü yerin sahibi 55 milyon dollar ilə “Ac oyunlar” romanının müəllifi Syuzan Kollinsdir. Jurnalın məlumatına görə əsərin uğur qazanmasına səbəb olan amillərdən biri də onun ekranlaşdırılması olub. Filmin qazancı 690 milyon dollar təşkil etmişdi.

Dördüncü yerdə “Linkolnu öldürmək”, “Kennedi öldürmək” kimi trillerlərin müəllifi Bill Oreyldiir. Onun il ərzində gəliri 28 milyon dollar təşkil edib. Müəllifin bu yaxında nəşr olunacaq “İsanı öldürmək” əsərinin ona daha böyük qazanc gətirəcəyi proqnozlaşdırılır.

Beşinci yerdə ötən 12 ay ərzində 26 milyon dollar gəlir əldə etmiş Daniella Stil dayanır. Stil yazıçılıq karyerası boyu ümumilikdə 128 kitab dərc etdirib. Bu kitabların əksəriyyəti qadın romanlarıdır. Əsərlərinin ümumi tirajı 600 milyon ədəd təşkil edir.

• Yazıçılar gündəmi şərh etməlidirmi? - Cavid Ramazanov
• Aprelin 2-si Beynəlxalq Uşaq Kitabı Günüdür
• Rza Tamer vəfat etdi