Kulis.Az Günel Mövludun yenicə çapdan çıxmış “Axşamçağına cavab” kitabında yer alan şeirlərdən bir neçəsini təqdim edir.

Balıq qətli

Leselidze küçəsində

İyirmi dörd saat işləyən supermarketdə

Nəhəng akvariumda

Həmişə satılıq balıqlar olur

Mənə ingilis dilində cavab verən

Arıq satıcı qızdan

Dörd balıq istəyirəm

Akvariuma tor atıb

Dörd balıq çıxarır arıq gürcü qızı

Başlarını qanlı daşa vura-vura

Öldürüb, mənə uzadır balıqları

Ömrümdə ilk dəfə

Dörd canlının qətlinə

Fərman vermişdim bu gün...

Bazar lövhələri

«Didube» metrosunun çıxışında

Gürcülərin çaxır

Azərbaycanlıların kartof-soğan satdığı

Balaca bazarda

Narıncı, şən mandarinlərin yanında

Köhnə kitablar düzmüşdü saqqallı satıcı

İki kilo mandarin

Bir də Çexovun «seçilmiş əsərləri»ni aldı

Əlləri tir-tir əsən rus qarısı

Kilsə zəngləri

Ateistəm, amma

Tiflisdə olanda

Xristian olmağım gəlir

Nəsə gözəl bir şey var

Yaşıl gözlü gənc keşişin

Çörəyi şəraba batırıb

Örpəkli qızların

Dilinin üstünə qoymasında...

Bir də...

Kilsə zənglərində

Kədərli heç nə yoxdu...

Tiflis. 22 yanvar. 2013

"Axşamçağına cavab" kitabını “Əli və Nino”, “Akademkitab” və “Qız qalası” kitab mağazalarından əldə edə bilərsiz.

• Castin Timberleyk ilk dəfə Azərbaycanda çıxış edəcək
• "Çox vaxt bu evə gizlin gələrdi" - Heydər Əliyevin uşaqlığının və gəncliyinin keçdiyi evdən reportaj
• Rejissor Elxan Cəfərov: "Mənim üçün yarım milyon kino pulu deyil" - Müsahibə