Sevgi uzun sürən bir xəstəlikdi...

Sevgi uzun sürən bir xəstəlikdi...
1 mart 2013
# 08:45

Kənan Hacının şeirləri

Yarımçıq qalmış alın yazısı

Taleyin o üzündə bir axşam var,

Dibinə tökülür ulduzları,

İçimdəki işığı da yeyib qurtardım o axşam,

Qartımış ümidi dişim kəsmədi,

Qəfildən sən gəldin,

Gözlərində işıq gətirdin,

Sonuncu payızda

Ürəyim yarpağını tökəndə

Yarpaqlardan bir ev tikdin,

Hər axşam işıq daşıdın o evə,

Ürəyimin qapısını

Təbəssümünlə döydün hər axşam.

Taleyin o üzündə bir dəniz var,

Dibinə tökülür balıqları,

Komasına hər axşam

əliboş qayıdan balıqçı kimi qayıdıram o dənizdən…

Taleyin bu üzündə bir nağıl var,

Belə başlar:

Biri yoxdu, biri vardı,

Leylisindən ayrı düşmüş Məcnun vardı,

Yarımçıq qalmış alın yazısını

Tamamlamağa ömrü çatmadı…

Bilirəm, gülüb deyəcəksən:

Axı belə şeir olmaz…

Dəvəm ölsə də bilirəm,

Daha məndən ərəb olmaz…

15 fevral 2013

Uzun sürən xəstəlik

Aldada bilmirəm özümü daha,

Məni fitə basır şirin yalanlar.

Şəklini duz kimi basdım yarama,

Kara gəlməyəndə acı dərmanlar.

Kəndirin gücü yox məni boğmağa,

Nəfəsim sivişib çıxır ilgəkdən.

Bu, dar ağacıdı yoxsa tərəzi,

Cəzam yüngül gəlir qəbahətimdən.

Sevgi uzun sürən bir xəstəlikdi,

Bəlkə də ən sağlam xəstənəm sənin.

Sevgiyə əl basıb and içirəm ki,

Hər vaxt qoruyacam özümdən səni!

18-19 fevral 2013

***

Əvvəl saatın neçə olduğunu unudasan,
sonra ayın tarixini,
sonra ayı, ili,
sonra saymağı unudasan,
onda yaşın da hesabını itirəcəksən,
kəsirləri unudasan,
kəsilməz onda sevgin,
suyu yadırğaya dilin-dodağın,
odu unutsan, yandırmaz səni
ayrılığın atəşi,
sahildə qağayıların sağlığına içib keflənəsən
və özünü qağayılara yem edəsən...
nə qədər gec deyil bitir bu işi,
yoxsa bunu sənin əvəzinə
zaman edəcək...

27 fevral 2013

# 3056 dəfə oxunub

Oxşar xəbərlər

"Milli Kitab 10-luğu" - "Əli və Nino"

"Milli Kitab 10-luğu" - "Əli və Nino"

20:27 29 aprel 2025
Bir qrup şair var ki... - Şair xanımları bacı kimi sevənlər

Bir qrup şair var ki... - Şair xanımları bacı kimi sevənlər

17:30 28 aprel 2025
Gizli tapşırıq: “Boynuna qoyana qədər döyün!”

Gizli tapşırıq: “Boynuna qoyana qədər döyün!”

09:00 28 aprel 2025
Tənqidçi sadə söz adamıdır, başqa heç nə... - Cavanşir Yusifli

Tənqidçi sadə söz adamıdır, başqa heç nə... - Cavanşir Yusifli

11:00 27 aprel 2025
Milli düşüncə tariximizdə Mir Cəlal - Elnarə Akimova

Milli düşüncə tariximizdə Mir Cəlal - Elnarə Akimova

14:00 26 aprel 2025
Məmməd Orucla bir gün... - VİDEO

Məmməd Orucla bir gün... - VİDEO

09:40 23 aprel 2025
# # #