2012-cü il Ədəbiyyat üzrə Nobel Mükafatına layiq görülmüş Çin yazıçısı Mo Yan Türkiyədə səfərdə olub. Səfər zamanı o digər bir Nobel mükafatçısı Orxan Pamukla görüşüb. Kulis.az Orxan Pamukun görüş barədə yazdığı təəssürat yazısını təqdim edir:

Böyük Çin yazıçısı Mo Yan əkinçiliklə məşğul olub, pambıq zavodunda işləyib və əsgərlik çəkib.

Amma indi mənim kimi o da işini sevən və zəhmətkeş bir yazıçıdır. Bir-birimizi kitablarımız vasitəsilə tanımışıq. 2006-cı ildə, Nobel Mükafatının mənə verilməsindən iki ay qabaq, “Mənim adım qırmızı” Çin dilində nəşr olunanda, Mo Yan romanı oxuyub Pekindəki Türkiyə səfirliyinin keçirdiyi tədbirdə iştirak edib və Çin mətbuatına mənim haqqımda gözəl sözlər söyləyib.

2008-ci ildə Pekinə gedəndə görüşdük, dost olduq, yemək yedik.

2012-ci ildə Nobel Mükafatını aldıqdan sonra Mo Yan ilk xarici səfərini İstanbula etdi.

Bu həftə həyat yoldaşı ilə birlikdə iş yerimi ziyarət edəndə Boğaz mənzərəsinə və kitablarıma baxdı, sonra mənim masama oturmaq istədi. Mən də Mo Yanın yanına getdim, qızım Röya bu fotonu çəkdi. Türk dilinə yeni tərcümə olunan “Qırmızı darı tarlaları”nın (türkcə “Kızıl Darı Tarlaları”) geniş miqyaslı fantaziyaya malik olan müəllifi kompüter istifadə etmir, romanlarını mənim kimi otuz ildir qələmlə yazır.

Yazıçılıq üçün səbrin vacibliyindən, tək qalmağın və iş masasına bağlı qala bilməkdən danışdıq. Zarafat edib Mo Yanı güldürəndə sevinirəm və çətin keçən həyatına görəmi, yoxsa yazıçı olduğuna görəmi mənə həmişə səssiz, fikirli və kədərli görünür, baş açmıram...

Tərcümə edən: Günel Əsgərzadə

• Milyonlar qazanan dahi niyə kimsəsiz qəbirdə dəfn olundu? – Rembrandt kimdir?
• Məşhur rəssam vəfat etdi
• Birgə Bəyannamə: "Mədəni və etnik müxtəliflik: tarixin dərsləri, müasir çağırışlar"