Kulis.Az Mirmehdi Ağaoğlunun 3 qısa hekayəsini təqdim edir. Hekayələr müsabiqədə iştirak etmir.

1.

Ekskavatorçu (490 işarə)

Şahinə ithaf

- Ata, adam rəhmətdiyə gedəndə, hara gedi?

Əmisi rəhmətə gedəndən sonra balaca Kanın bəlkə yüzüncü dəfə verdiyi bu suala atası hər dəfə “o dünyaya gedirlər”, “başqa dünyaya gedirlər”, “heç vaxt ordan qayıtmırlar” kimi cavablar versə də görünür heç birində üç yaşlı uşağı qane edə bilməmişdi.

Bu dəfə həqiqəti dedi:

- Torpağı qazıb basdırırlar. Mən də rəhmətə gedəndə belə edəcəklər.

- Hə?

- Hə.

Hər ikisi susdu.

Ka əlində tutduğu oyuncaq ekskavatoru müzəffər bir ədayla qaldırıb atasına tuşladı.

- Mən də ekskavatorla torpağı qazıb səni çıxardacam. Vıyyy, bax belə.

2.

Hekayə

Gecəyarı. Qapı döyülür. Qadın qapını açır:

- Yenə içmisən. Bezdim artıq, nə vaxta kimi belə olacaq?

Kişi qapıya qaçan qızını sakitcə qucağına alıb öpür, səntirləyə-səntirləyə divana sarı gedir.

- Maaş aldun?

- Yox.

- Da niyə gəlürdün, qalıb zəhərlənərdün dostlarınla. Biz acından ölsək də olar.

- Ata hekayə yazmışame, - qızı deyir.

- Afərin.

- Gətirim baxırsan?

- Hə.

- Atan yazıb ağ günə cıxardıb bizi... - Mətbəxdən qadının səsi gəlir.

Uşaq qorxa-qorxa dəftəri atasına uzadır.

Kişi eynəyini taxıb dəftərə baxır:

"Gecəyarı. Qapı döyülür. Qadın qapını açır:

- Yenə içmisən. Bezdim artıq..."

3.

Dünyanın ən qısa hekayəsi və ya Maleviçə ithaf (1 işarə)

O

• 79-cu Kann Film Festivalı: "Qızıl Palma Budağı" uğrunda kimlər yarışacaq?
• "Apokalipsis qaçılmazdırmı?" - Zaman Piriyevin kitabları təqdim olunacaq
• Gilavar Foto Klubu WUF13-də üç fərqli mövzuda fotosərgi açdı