Kulis.Az Alik Əlioğlunun yeni şeirlərini təqdim edir.

Yad şəhərdə

Səhərlər durub tanımadığımız

Bir şəhərin dar

küçələrini süpürürük, zibilini daşıyırıq

Gecələr

Oyanıb dərisini gün yandırmış

Qıvrım cod saçlı yetim uşaqlara

Ən xoşbəxt şahzadənin nağılını danışırıq...

Kimsə gəlməlidir.

Günlər uzanır və heç kəs gəlmir.

Geriyə baxmaq dəhşətlidir.

Görürsən ki,

İllər öncə qulağını qatar relsinə dirəyib

Qatarın səsini dinləməklə

Uzaqlar arzusunda yaşadığınçün

Səni gətirib uzaqlara atıblar...

Görürsən ki, yiyəsizsən...

Görürsən ki, bu amansız məhəllədə

Günbəgün itlər də yoxa çıxır,

Pişiklər də...

Bilmirsən öldürürlər, ya azdırırlar...

Və sən

Bilmirsən hönkürüb ağlayasan

Ya sadəcə kədərlənəsən...

Elə bir doğma adam gəlməlidir ki,

Onu öpmək yox, qoxlamaq istəyəsən.

Yanında olduğuna əmin olmaq üçün

əlini üzünə qoyub yoxlamaq istəyəsən...

Günlər uzanır. Heç kəs gəlmir...

Və sən bir-bir ölürsən...

Qadın və s.

Bütün dustaqların bir mövzusu var:

Yeni həyata necə başlamaq...

Harada, kiminlə?

Bəmbəyaz bir qadın,

Yorğun təbəssümlə

Axır küçədə...

Leysan yağışda su misalı

Üzüaşağı...

Kişi və qadının görüşü

Tale deyil yəqin,

Ssenaridir düşünülməmiş...

Adəmlə Həvvanın işidir -

Sonadək görülməmiş.

Qadın – küçə qaydalarını pozmaqdır.

Və

Bir az uduzmaqdır...

Bütün dustaqların bir mövzusu var:

Yeni həyata necə başlamaq...

Harada, kiminlə?

Həyata qadından başlamaq

Taleyindən kənara çıxmaqdır.

Bədbəxtlikdir yəni

Ah, yazıq Pirosmani...

Şərif Ağayara

Bir gün oyanıb

Dəmir barmaqlıqlardan çıxan

Və üzü Allaha tərəf

Addımlayan qoca bir kişiyə çevrildim.

Bir əlim iflic oldu

Bir əlimi ona verdim...

Bir üzümü saqqal basdı,

Bir üzümü ona çevirdim.

Bir tərəfim çürümüşdü,

Bir tərəfimlə sevirdim...

Səni, onu, hamını...

Hamını sevmək olmur –

Keçən il bu qənaətə gəldim.

Və bu il haqqımda ən yaxşı sağlıq deyildi

Badə qaldırdı dostlarım

Şərif məni bir sualla ifadə elədi:

“Olar ağlayım?”

• “Dilbərim” xalq mahnısı əsasında musiqili təqdimat hazırlandı
• Dünyanın ən məşhur 10 milli geyimi
• Tanrım, sonda nə var? - Rüstəm Behrudidən yeni şeir