Yusif Rzayev

Əzizim Qismət!

Burnunun üstündəki o əməkdar eynək dünyanı necə göstərir?

Göy üzünü təmiz göstərə bilirmi?

Ağaclar yarpaqlayırmı?

Çicəklər qönçə bağlayırmı?

Ulduzlar bulaşıq görünmür ki?

Mən o eynəyin arxasından baxan o bir cüt gözün çox fərqli şəkillərini görmüşəm:

Sən xaricdən müalicədən təzəcə qayıdan dostunun – Zərdüştün telefonda gümrah səsini eşidib uşaq kimi şadlananda o bir cüt göz sevincdən par-par yanırdı...

Çox yox, bir neçə ay sonra dostunu – Zərdüştü itirmək xəbərini eşidib keyimiş vücudunla nə baş verdiyini hələ tam qavramayanda o gözlər yaş içində az qalırdı hədəqəsindən çıxsın...

***

Bəs ürəyin nə deyir?

Göy üzünün təmizliyinə inanırmı hələ?

O ürəkdən boylananda -

Agaclar yarpaqlayırmı?

Çicəklər qönçə baglayırmı?

Ulduzlar bulaşıq görünmür ki?

... Mən o ürəyin də çox fərqli şəkillərini görmüşəm –

Neçə vaxtdan bəri yazmaq istədiyin, gecə-gündüz havasına yaşadığın yazını bitirib son nöqtəsini qoyanda da, gözəl bir kitabı oxuyub qurtarandan sonra aldığın zövqü bölüşəndə də, tay-tuşlarından kimdəsə bir istedadlı cümlə, misra tapanda da o ürəyin qocamancasına necə sevindiyini görmüşəm.

İstedadına və intellektinə inandığın cavan bir əhli-qələmin dünən dediyi sözə bu gün naxələf cıxdığını görəndə də, yazısına görə qocaman bir yazıçıya olmazın təhqirlər yağdırılanda da o ürəyin hansı təlatümlər yaşadığını hiss eləmişəm...

***

Sənin hələ nə yaşın var ki?

Amma yazan adam üçün bu yaşda bu dəyişkən olacaqlara şahidlik eləmək təkcə ŞAHİDLİK ELƏMƏKlə bitmir ki: bu təlatümlər adamın içındə dərin izlər qoyur, zədələr buraxır... Di gəl bundan sonra yaz görüm, necə yazırsan, o dupduru sözləri ovundur görüm, necə ovundurursan?

Bilirəm, bilirəm ki, bunları sən özün də bilirsən və həm də hamıdan yaxşı bilirsən. Ona görə deyirəm ki, bunları bilsən də yorulmayasan, usanmayasan – yazasan...

Yazasan! Heç nəyə, heç kimə baxmadan yazasan!

Bir də o əməkdar eynəyin arxasındakı o gözləri və o ürəyi qoruyasan!...

https://www.facebook.com/yusif.rzayev.10

• Divardakı yazı - “Səksənincilər" layihəsindən Aydın Tağıyevin hekayəsi
• Britaniyanın "rəsmi dövlət şair"i - O, Silviya Platın gündəliklərini niyə məhv etmişdi?
• "Mən burda yaxşıyam, sən də yaxşı ol" - Salyanda Həsən Kürün xatirəsi anılıb