Kulis.Az Qismətin yeni şeirlərini təqdim edir.

1. İlahənin yuxusu

Sənin qıvrılıb, yumaq olub

mışıl-mışıl yatdığın gecələr

mən o qədər əlimi çənəmə qoyub

sakit-sakit baxmışam ki, sənə...

O qədər düşünmüşəm ki...

Dənizgözlüm,

bir gün gözlərinə baxa bilməsəm,

bir gün əllərini tuta bilməsəm,

bir gün saçlarının qoxusu ilə

ovsuna düşməsəm, sehrlənməsəm -

bir gün dodaqların hökmsüz olsa,

sənin öpüşünlə möhürlənməsəm,

onda bu dünyada,

bu boz dünyada

rüşvət də versələr yaşayammaram...

Mən balıqlar bürcü, sən dənizgözlü

gözlərin olmasa ölüyəm demək.

bircə gülüşünlə üzüm gülürsə,

mən sənin dərdindən dəliyəm demək.

Dizini qatlayırsan, çay içirsən

birdən gözlərimiz sataşır

onda dodağına bir gülüş qonur

bəyaz bir gülüş,

sevgili bir gülüş,

göyərçin bir gülüş...

Sən yuxuda olanda

mən nələr düşünürəm, nələr...

özümü düşünürəm

və heç vaxt da bağışlamıram !

2. Xatirə

Bir dəfə, bir dəfə, nəsə bir dəfə

yolum uzaq-uzaq ellərə düşdü.

onda İlahədən bir mesaj gəldi :

"sənsiz yuvasızam".

3.Olsa...

Sən zəif canınla, zərifliyinlə

elə işıqsan ki, elə nursan ki,

dünyada bircə fəsil qış olsa,

vız gələr, dənizgözlü günəşim.

4. Adsız

Pişik alaq süd içsin, çiçək alaq sula sən,

Əllərini şərf kimi boğazıma dola sən,

Çay dəmlə, məni gözlə, durub boylan yola sən,

Mən əlidolu gəlim, cumub məni qucaqla,

əlimdən yerə düşsün aldığım oyuncaqlar...

Sənin mənə "Can" deyən şirin dilindən öpüm,

O dəniz gözlərindən, o gül telindən öpüm,

Durum yazımın üstdən, gəlim əlindən öpüm,

O zərif əllərindən, o yumşaq əllərindən,

O körpə əllərindən, o uşaq əllərindən...

Halal olsun ruzimiz, haqq bizdən razı olsun,

Üstümüzdə həmişə bərəkət tozu olsun,

Əşşi mən nə dedim ki, olsun, qızımız olsun,

Anasından naz alsın, atasından dəyanət

Səadət bu deyilsə, onda nədir səadət ?

• "Mesaj yazırlar ki, sənin dilini kəsəcəyik" - Elman Nəsirovla müsahibə
• "Satıcı oğlan xəyalındakı qadını soyundururmuş kimi..." - Fəridə
• İlahi və həyati eşqin arasında - "Məsnəvi"yə niyə "folklor ensiklopediyası" deyirlər?