"Kulis" yarandığı gündən haqqında dəfələrlə tənqidi yazılar yazılıb.

Ən böyük tənqid də başlıqlarla bağlıdır.

Sən demə, başlıqlar naqolaymış.

Məsələn, hansısa məşhur haqqında maraqlı faktlar verilir. Onun həyat və yaradıcılığını ehtiva edən cümlə başlığa çıxarılır. Və budur, tənqid oxları monitorları dəlib keçir.

Axı başlıqları uydurmuruq... O adam o cür yaşayıb, o adam o işləri görüb...

Tutalım, başlığa "Nizami Gəncəvi yaradıcılığında ruhani qatlar: Ekzistensialist çöküşün alliterasiyası" çıxarsaq, tökülüşüb oxuyacaqsınız?
Fəqət "Nizami Gəncəvinin qadınları - Nüşabə İsgəndərə niyə xəyanət etmişdi?" - başlığına cumursunuz.

Biz beləyik. Neynək... Çalışırıq, heç olmasa, belənçi başlıqlarla olsa da, gözünüzə mədəni/ədəbi şölə salaq.

Məsələn, dünən belə bir eksperiment apardıq.

“Nia ilə Furkan barışdı – Açıqlama” başlığı ilə bir material dərc etdik:

Oxunma sayını görürsünüz də...

İndi gəlin dünənki sanballı materialların oxunma saylarına baxaq;

"Qarğıdalı adası"nın rejissorunun müsahibəsi

Fəxri Uğurlunun yazısı

Hekayə müzakirəsi

Rəvan Cavidin "Kübra" serialı haqqında yazısı

"Kulis"i səhərdən-axşamacan tənqid, hətta təhqir edən adamlar haman bu sanballı materialları oxumurlar.

Kimdən soruşsanız, xəbəri yoxdur, bayağı materialları oxumur, yaxşı bu xəbərləri oxuyanlar kimlərdir? Harada yaşayırlar?

İndi özümüzdən soruşaq görək axırıncı dəfə nə vaxt sanballı, keyfiyyətli mətn oxumuşuq...

Oxumuşuq, paylaşmışıq...

Bizim saytlardan gözləntimiz budur ki, onlar diqqət çəkən başlıq qoyacaqlar, biz də skrin eləyib, profilimizdə paylaşıb, üstündən “ağıllı” sözlər yazaraq eqomuzu təmin eləyəcəyik.

Vəssalam!

Elmi məlumatlar, intellektual söhbətlər, sanballı müsahibələr – bunların heç birinin gözünüzdə bir qəpik dəyəri yoxdur.

Olsaydı, nəticələr belə olmazdı.

Ancaq nəticələri dəyişmək də öz əlinizdədir.

Siz sanballı materialları oxuyaraq bizə dəstək olacaqsınız, biz də sizə daha sanballı materiallar təqdim edəcəyik...

• “Dünyanı uşaqlara verək!” adlı bədii-maarifləndirmə aksiyası baş tutdu
• Şahnaz Haşımovanın vəziyyəti açıqlandı
• “İgidlərin sözü” layihəsinin ikinci antologiyası təqdim olundu