Tofiq Nurəli Mirmehdi Ağaoğlunun səksəninci illər ədəbi nəsli ilə bağlı tənqidi yazısına şeirlə irad bilirib.

Bu barədə Mirmehdi Ağaoğlu öz sosial şəbəkə hesabında yazıb.

O, bildirib: "Ötən gün şair Tofiq Nurəli Vatsapıma yazıb səksənincilər nəsli barədə Kulis.az-a verdiyim açıqlamaya etirazını bildirdi: "Biz itib-zad eləməmişik". Deyəsən ürəyi soyumayb, bu mözuda yazdığı şeirini də yolladı. Şeiri oxuyub, özünə yazdım ki, ay Tofiq müəllim, siz elə mənim fikirlərimi şeirlə söyləmisiz, nəyə etiraz edirsiz? Siz də oxuyub, fikrinizi bildirərsiz. Düz demirəm, siz Allah?!

P.S. Yəqin şeiri burda paylaşdığıma görə Tofiq müəllim etiraz etməz. İnsafən, pis şeir də deyil.

Mənim yaşıdlarım

Mənim yaşıdlarım tez qocaldılar
Elə mənqarışıq, özümqarışıq.
Dostlara baxmağa utanır adam
Saçlar bəyazlaşıb, alın qırışıq.

Bilmirəm nə idi sıxan-sındıran
Biz hansı fitnənin felinə düşdük?
Necə qoruyaydıq bir-birimizi –
Zamanın toqquşan yerinə düşdük.

Bizim taleyimiz eyni yazılıb,
Alın yazımızın diqtəsindəydik.
Bizim günahımız deyildi axı –
Vulkanın püskürən nöqtəsindəydik.

Bizi şax olmağa öyrətmişdilər,
Anlaya bilmədik hara əyilək;
Bizimki deyildi köhnə zəmanə,
Təzə dövrana da gərək deyilik.

Səmtsiz bir boşluğa düşdük qəfildən,
Zamanın seçdiyi qurbanlıq bizik.
Durub öz-özümə deyirəm hərdən
Bizi unutdurdu bu çəkisizlik.

Bizdən əvvəlkilər qaldı yerində,
Bizdən sonrakılar qısıb səsini
Bizim çiynimizin üstə salamat
Keçdilər fəlakət məsafəsini...

Mənim yaşıdlarım tez qocaldılar
Alın yazımızın felinə düşdük?!
Zəmanə qurbanlıq yetirdi bizi
Zamanın toqquşan yerinə düşdük.

22.11.2005"

• Südabə Sərvinin yeni kitabı çap olundu
• Rikoşet - Vüqar Vanın yeni hekayəsi
• "Səni sevmək başqa birinə sillə vurmaqdı" - İlham Qəhrəmanın şeirləri