Yoxlamışam, Yelena, yaxşı yanır şeirlər...

Yoxlamışam, Yelena, yaxşı yanır şeirlər...
11 noyabr 2012
# 15:08
FRAQMENTLƏR

Hardasan, hardasan
ciyərimə nəfəs, gözümə işıq ?
Sənsiz yenə
"Yaxşı olar, düzələr"- ə qalmışam...

***

Mən insafsızam, əclafam.
Görürsən
səni əziyyətə salmıram,
hər şeyi özüm deyirəm...

***

Niyə axı
öpüşdüyümüz kafelərdə
həmişə sevmədiyimiz mahnıları çalırlar ?
Bəlkə "durun evə gedin" - demək istəyirlər... ???

***

Bir dəfə "sən bəlasan" demişdin.
Allah Bəlanı versin !

***

"Başını burax..."
Nə ağırdı sözdü?!
Dizində onun başı yox,
külqabı olanda
lap ağırdı.


KLASSİKA MƏŞQLƏRİNDƏN

Əlləri su damlası, boynu uzun Yelena,
Səsin mənə mükafat, gözün hüzn Yelena,
Şeir oxu soyuqda, sözlə qızın, Yelena,
Qızınmasan yandır ki, qızınasan birtəhər,
Yoxlamışam,Yelena, yaxşı yanır şeirlər...

Sən bilərsən, yıxıldım, yoxsa daş kimi düşdüm ?
Düşdümsə də ölmədim, çünki çoxdan ölmüşdüm.
Sənsiz keçən günlərin var-yoxunu... demişdim,
Qəzəbimi boğuram, çox getmirəm dərinə,
Nə istəsən yaz getsin nöqtələrin yerinə...

Maşınlar ötüb keçir, dönər alır uşaqlar,
Dişlərini ağardır yazılmamış varaqlar,
Yoxluğundan tikilib bütün evlər, otaqlar,
Mən sənin yoxluğuna mühacirəm, Yelena,
Nə düşünsən haqlısan, müqəssirəm, Yelena.

KÖHNƏ VARİANT

Guya mesajı səhv göndərirsən
guya sadəlövhsən bu qədər
guya qıcıqlandıracaqsan onu
sonra şeirini yazırsan guya
pah atonnan !

BELƏ-BELƏ İŞLƏR...

Neyləməli,
sevgi bir az da uşaq olmaqdı deyəsən.
Amma bankomatın qabağında
növbə gözləyən təqaüdçülər də var.
Amma "Arzular" kafesi də var bağrımızın başında
özlərindən və ümidlərindən
başqa heç nəyi olmayan adamlarıyla...
Biz onların nəyiyik, əzizim,
onlar bizim nəyimizdi ?
Mən sənin nəyinəm, məsələn,
sən mənim nəyimsən ?
Atalar sözləri
niyə ancaq atalara kömək eləyir ?
...əsrlərdir
itlər hürən bu şəhərdən
bircə karvan da keçmir ki,
baş götürüb gedəsən.
Başına düşən daşlardan
öz qəbrinə
daş götürüb gedəsən...
bir çemodan ümid,
bir şüşə darıxmaq
bir də gözlərin üçün
yaş götürüb, gedəsən.

Gedəsən, adam kimi gedəsən,
arxada qalan hər şeyə,
bir də
dabanına tüpürüb, gedəsən.
təpədən-dırnağacan
özünü hamıdan süpürüb, gedəsən.

Gedəsən,
karvanların bələdçisi itlərin olmadığı şəhərə....


SIXINTI

Evlərin işıqları gözlərini yumarkən,
yalquzaqlara qohum köpəklər
kosmik bir təkliyi hürərkən gecənin içinə,
bir park düşünün
payına siqaret kötükləri düşən,
səhərlər süpürgəçi qarıların belə darıxdığı
bir park düşünün
gəzilmiş,
keçilib gedilmiş,
skamyasız...
# 1834 dəfə oxunub

Oxşar xəbərlər

Məktub yetişmədi - Abdulla Şaiqin hekayəsi

Məktub yetişmədi - Abdulla Şaiqin hekayəsi

18:23 24 iyul 2024
"Gələcək onu ölümə tərk edəcək" - Aqşin Yenisey

"Gələcək onu ölümə tərk edəcək" - Aqşin Yenisey

11:18 24 iyul 2024
Qadınlar cəmiyyətin diktələrinə məğlub olan insanlardır - İlahə Səfərzadə

Qadınlar cəmiyyətin diktələrinə məğlub olan insanlardır - İlahə Səfərzadə

14:41 23 iyul 2024
"Dəyişən reallıqlar: Haruki Murakaminin "1Q84"ü - Adam Kirş

"Dəyişən reallıqlar: Haruki Murakaminin "1Q84"ü - Adam Kirş

13:13 23 iyul 2024
Nəriman Nərimanov Tağıyevin pul yardımından niyə imtina etmişdi?

Nəriman Nərimanov Tağıyevin pul yardımından niyə imtina etmişdi?

09:00 23 iyul 2024
Musiqiçilərin, ədəbiyyatçıların biabırçı vəziyyəti... - 2006-cı ildən bəri qiymətlər niyə qalxmır?

Musiqiçilərin, ədəbiyyatçıların biabırçı vəziyyəti... - 2006-cı ildən bəri qiymətlər niyə qalxmır?

17:27 22 iyul 2024
# # #