Dünyaya yeni gəlmiş körpənin yanına vura-vura beyninə bu sözləri yeritmək lazımdır: “Yazmamalısan! Yazmamalısan! Yazıçı olmamalısan!” Bundan sonra yenə də yazıçılığa meyl etsə, nəvazişlə onu bu yoldan döndərməyə çalışmalısan. Bu da işə yaramasa, təslim olub onu “itirilmişlər” siyahısına əlavə etməkdən başqa çarən qalmır. Çünki yazıçılıq elə bir qaşınmadır ki, müalicəsi yoxdur.

Yazıçının yolu tikanlar, mismarlar, gicitkənlərlə doludur, buna görə də ağlı başında olan adam əlindən gələni edib yazıçılıqdan uzaq durmalıdır. Amma bütün xəbərdarlıqlardan sonra da yazmaq sevdası onu yazıçı olmağa məcbur edirsə, onda o bədbəxt başına gələcək təhlükələri xəfiflətmək üçün aşağıdakı qaydalara əməl etməlidir:


1. Zövq üçün yazıçı olmaq, onu bir peşə kimi qəbul etməkdən daha yaxşı bir həyat təmin edəcəyini bilməlidir.

2. Ədəbiyyat meydanında müvəffəqiyyətsizliyin uğurdan min qat yaxşı olduğunu qulağına sırğa etməlidir.

3. “Sənət naminə sənət” yaratmağın, sentimental bir hadisədən istifadə etməkdən daha yaxşı olduğunu yadından çıxarmamalıdır.

4. İmtiyazlı gənc bir zadəgan və yaxud da bir lisey şagirdi olmamalıdır.

5. Mütləq ağlı başında olmalı və yazıçılıqda təcrübə toplamalıdır.

6. Utancaq olmamalı, kağızı qabağına qoyub, əlinə qələm götürüb ağlına gələni yazmalı və sonra da qovluğunu qoltuğuna vurub nəşriyyat-nəşriyyat gəzməli, heç kim çap etməyə razı olmasa, qorxmayıb öz hesabına çap etdirməlidir.

7. Kitabları çap olunan və oxunan bir yazıçı olmaq üçün mütləq mütaliəli olmalı və heç olmazsa, arpa dənəsi boyda da olsa, istedadı olmalıdır.

8. Dürüst olmalı, başqasının yazdığını özününkü kimi təqdim etməməli; eyni kitabı iki nəşriyyatda birdən çap etdirməməli; xaricilərə məxsus bir şeyin yerli olduğunu sübut etməyə çalışmamalıdır.

9. Həqiqi həyatda olduğu kimi, yazı dünyasında əxlaqlı davranmalı, başqasının quyruğunu tapdalamamalı, dəsmalına fınxırmamalı, çörəyinə bais olmamalıdır.

10. Yazmağa başlamazdan əvvəl bir mövzu seçməli, amma Amerikanı və ya barıtı ikinci dəfə kəşf etməmək üçün çox çeynənib saqqıza dönən mövzulardan uzaq durmalıdır.

11. Sərbəst təxəyyüllə, lakin nəzarətli şəkildə yazmalıdır; nə qədər qısa və səmimi yazarsa, o qədər çox sevilərək çap olunacağını unutmamalıdır.

12. Şöhrət axtarmırsa və döyülməkdən qorxursa, təxəllüsdən istifadə etməli, amma əsl adını və ünvanını nəşriyyata mütləq bildirməlidir.

13. Ödənişi kitab çap olunduqdan sonra almalı, avans götürməkdən yayınmalıdır.

14. Qazandığı pulu ürəyi istədiyi kimi qazanmalıdır.

15. Ən sonda bu qaydaları bir daha oxumalıdır...


Hazırladı: Vüqar Qurdqanlı

• Məşhur türk aktrisa vəfat etdi
• Kurt Şnayderin psixopat təsnifatı - Siyahıda kimlər var?
• Məşhur rəssamın itkin əsəri təsadüfən tapıldı