Seymur Baycan Tiflisdə psixi müalicə alır. Bu barədə Kulis.Az-a yazıçının özü məlumat verib. O, bir aya yaxındır ki, Gürcüstandadır.

Xəstəliyi ilə bağlı danışan yazıçı deyib: “İki ildi məndə belə bir təəssürat yaranıb ki, qarnımda qurbağa yaşayır. Bir az əziyyət çəkirəm. Teatra, ictimai yerlərə gedə bilmirəm. Sakit yerdə otura bilmirəm ki, birdən quruldayar, yaxşı çıxmaz, narahatlıq yaranar. Doktor mənə başa saldı ki, bu mümkün deyil. Belə bir şey ola bilməz. Mən də dedim ki, bəlkə suyun içində balaca balasını udmuşam, qarnımda böyüyüb.”

Yazıçı bir aya yaxındır davam edən müalicədən sonra artıq qurbağanı unutmağa başlasa da hərdən yenə də yadına düşdüyünü deyib.

Yazıçı Gürcüstanda müalicə almasının səbəbini də açıqlayıb: “Bakıda dostlarım mənə bir həkim tapdılar. İki dəfə söhbət etdik. Məlum oldu ki, həkim Dostoyevskini, Çexovu, Herman Hesseni, Knut Hamsunu oxumayıb. Mən də ədəbiyyat oxumayan adama inana bilmirəm. Danışmağa mövzu tapmadıq. Heç cür dialoq alınmadı. Sonra bir türk həkim tapdılar. O da hoqqabazın biri idi. Onun özünü müalicə edən lazımdı”.

Daha sonra Gürcüstanda yaşayan dostlarımın vasitəsi ilə bir həkimlə tanış oldum. İndi həftədə üç-dörd dəfə onunla söhbət edirik. Hər dəfə bir əsəri, mövzunu müzakirə edirik. Məsələn, dünən “Sənət sənət üçündür” mövzusunu müzakirə etdik. Ondan qabaq Çexovun “Altı nömrəli palata” əsərini müzakirə etdik. O deyirdi, “Altı nömrəli palata” əsəri Çexovun həkim müşahidələrinin nəticəsi idi. Mən isə dedim ki, xeyr, həkim müşahidələrindən əlavə Çexov özü də başqa dalğaya girə bilmişdi. Əsərdən iki cümlə göstərdim və dedim ki, bunu ancaq mərkəzi sinir sistemi çökmüş adam yaza bilər.

Qərara gəlmişik ki, ən sonda Knut Hamsunun “Misteriyalar” əsərini müzakirə edək. Çünki bu əsər elmlə ədəbiyyatın ən çox toqquşduğu əsərdir. Mən elmi inkar etmirəm, amma gərək elm də ədəbiyyatı inkar etməsin. Çünki bir söz deyən kimi “əsəbdi”deyib adamın üstünə möhür vururlar.”

Seymur Baycan müalicədən sonra doktorla söhbətlərini sistemləşdirib silsilə yazılar yazacağını söyləyib.

• Məşhur yapon xoreoqraf Bakıda ustad dərsləri keçdi
• "Anam yaza biləcəklərinin yüzdə birini də yaza bilmədi" - Nigar Rəfibəylinin görünməyən taleyi
• Adamyeyən köpəkbalığı, saraydan qaçan şahzadə... - Ən yaddaqalan 10 yay filmi