Kulis.az Rasim Qaracanın “Aprel şeirləri”ni təqdim edir.

*

Benzin dolduran maşının içində oturub

siqaret çəkən bir insan anlayar məni...

Saatını bilərəkdən 10 dəqiqə irəli quran,

ancaq bunu heç vaxt yadından çıxartmayan,

sadəcə belə edərkən

zaman adlı hakimə boyun əyməyən bir insan...

Aradabir dönüb öz kölgəsinə baxan,

ən böyük əyləncəsi şütüyən maşınları arasından keçmək olan biri...

Siqaretini səbətin düz ortasına fırladan adam, bax o,

yalnız o, anlayar məni...

*

Bir sevgi olayında silinən bu qadın

indi yenidən çəkir özünü

pənbə dodaq boyasıyla

*

Qadınlar gözəldir,

yeni qadınlar daha gözəl

*

Boşunadır hər şey boşuna

yaşamaq da bir iş idi

gəldi başına

*

Eyy,

yeri-göyü yaradan

rəssam ..!

*

Sadəcə pıçıldadım,

dalğalandı pambıq tarlası,

yenicə çərtilmiş qozalarda bəyaz bir gülümsəmə...

Dua kimidir sənin adın

*

Dəmirin qoxusu var,

insan bunun fərqinə varır

yalnızlıq onu saranda

və zaman gəlib-gəlib durğunlaşanda.

Ölümün də rəngi olur

ay soyuq-soyuq parıldayanda,

maşınların səsi eşidilməz olanda...

Boşluq anlam qazanır

ilbə-il təkrarlananda...

*

Maşınlara sıçar şəhərli quşlar

baxıb dodaq büzər səhradakılar...

*

Ona pul verənlərə

yavaşca “ş” deyən

beləcə təşəkkür edən

bu uşaq

*

Xəstəxanadan yazıram bu məktubu dostlar,

sizin dünyanızda nələr var?

Mənim dünyamdasa

pəncərədən süzülən damlalar,

yağmursuz günlərdə belə...

*

Dünyanı təsvir et mənə,

dənizi, göyüzünü, quşları,

bilmək istəyirəm, eynidirmi onlar,

mənim öz dünyamdakılarla...

*

Bu, qəlb deyil artıq,

qəlbin müsvəddəsidir,

bir halda ki adın yazılmış oraya

və sonra da pozulmuş...

oxuzali.az

• Dövran mənə zülm еtdi... - Molla Vəli Vidadidən bayatılar
• Rəssamın əsərlərindən icazəsiz istifadə edən iki nəşriyyat - Bizdə elm, sənət niyə inkişaf etmir?
• “Şuşa fatehi-Yunis Kazımov” kitabının təqdimatı oldu