Mayın 15-də, saat 19.00-da Azərbaycan Dövlət Kamera və Orqan Musiqi Zalında, (Kirxa 28 May küçəsi, 17) Dövlət Musiqili Teatrının solisti, əməkdar artist Nərgiz Kərimovanın solo konserti olacaq. Konsertə giriş pulsuzdur.

Azərbaycan Dövlət Fortepiano triosu – əməkdar artistlər Nərgiz Əliyarova (piano), Töfhə Babayevanın (violin) müşayətilə keçiriləcək konsert proqramında Azərbaycan, rus bə qərbi Avropa bəstəkarlarının əsərləri səslənəcək.

Məlumat üçün deyək ki, Nərgiz Kərimova, 1977-88-ci illərdə Bülbül adına orta ixtisas musiqi məktəbinin fortepiano sinfində oxuyub.

1988-1992-ci illərdə Ü.Hacıbəyov adına Bakı Musiqi Akademiyasının vokal sinfini qırmızı diplomla bitirib.

1988-ci ildə Bəstəkarlar İttifaqı adından keçirilən Musiqi Festivalının, 1989-cu ildə Bakıda keçirilən «Qızıl payız - 89» respublika müsaqibəsinin, 1990-cu ildə isə Moskvada keçirilən «Yeni adlar» III Ümumittifaq müsabiqəsinin laureatı olub.

1991-ci ildə Almata şəhərində keçirilən M.Qlinki adına XIV Beynəlxalq vokalçılar müsabiqəsində ikinci turda uğurlu çıxışına görə fəxri fərmanla təltif edilib.

1994-cü ildən Azərbaycan Dövlət Teleradio şirkətinin solistidir. Moskva, Sankt-Peterburq, Londonda, eləcə də Bakının bir çox nüfuzlu konsert salonlarında, dövlət tədbirlərində çıxış edib.

2002-ci ildən Azərbaycan Dövlət Musiqili Teatrının aktyorudur.

Teatrda işlədiyi müddət ərzində Mələk (S.Fərəcov, R.N.Güntəkin «Bir günlük siğə»), Nərgiz (R.Hacıyev «Talelər qovuşanda»), Mülayim (R.Mustafayev, A.Qüdrət «Volqalı canan»), Süsən (V.Adıgözəlov, Anar «Aldın payını, çağır dayını»), Gülnaz (Ü.Hacıbəyov «O olmasın, bu olsun»), Gülçöhrə “Arşın mal alan”) Səbinə (R.Mirişli, M.Haqverdiyev «Qısqanc ürəklər»), Bildirçin (S.Ələsgərov, Ş.Qurbanov “Milyonçunun dilənçi oğlu”), Yulişka (İ.Kalman “İdialı qaraçı”), Keto (V.Dolidze, A.Saqarelli “Xanuma”) rollarını oynayıb.

2003-cü ildə teatr sənəti sahəsində qazandığı uğurlarına görə «İlin ən yaxşı gənc aktrisası» nominasiyası üzrə fəxri fərmanla təltif edilib. Vokalçı, həmçinin 2012-ci ildə Qazaxıstanın Karaqanda şəhərində keçirilən “Docstar” I Beynəlxalq açıq müsabiqəsində birinci yeri tutub.

2012-ci ildə respublikanın əməkdar artisti fəxri adına layiq görülüb, Prezident mükafatçısıdır.

• Türkiyə və İtaliya arasında əməkdaşlıq – Arxeoloji tapıntıların müzakirəsi
• Şirməmməd Hüseynovun “İstiqlal söhbətləri” təqdim edildi
• Şüşə qablar, sənaye qalıqları və gündəlik əşyalar... - Parisdə qeyri-adi sərgi