Akademik Milli Dram Teatrı Türkiyənin Adana şəhərində keçirilən Sabançı Beynəlxalq Teatr Festivalından vətənə dönüb. Bu barədə kulis.az-a teatrın mətbuat xidmətindən məlumat veriblər. 14 aprel-16 may tarixləri arasında gerçəkləşən 16-cı Dövlət Teatrları Sabançı Beynəlxalq Adana Teatr Festivalına Akademik Milli Dram Teatrı “Lənkəran xanının vəziri” tamaşası ilə qatılıb. 1, 2 may tarixlərində Hacı Ömər Sabançı Kültür Mərkəzinin səhnəsində təqdim olunan tamaşanın quruluşçu rejissoru Əməkdar İncəsənət Xadimi Vaqif İbrahimoğlu, rejissoru Tural Mustafayev, quruluşçu rəssamı Əməkdar rəssam Rəşid Şerif, bəstəkarı Xalq Artisti Səyavuş Kərimi, rejissor assistenti Xanım Həsənovadır. Səhnə əsərində Xalq artistləri Nurəddin Mehdixanlı, Cəfər Namiq Kamal, Əməkdar artistlər Kazım Həsənquliyev, Elxan Quliyev, Əli Nur, Mirzə Ağabəyli, Ayşad Məmmədov, Mətanət Atakişiyeva, Münəvvər Əliyeva, Şəlalə Şahvələdqızı, və b. iştirak edirlər.

Proqrama həmçinin İstanbul Dövlət Teatrının “Səhra fırtınaları” və “Hamlet”, Kocaeli Böyükşehir Bələdiyyəsi Şəhər Teatrının “Qəfəsdən bir quş uçdu” və “İstanbul əfəndisi”, İspaniya Yllana Teatrının “Muu”, Ankara Ekin Teatrının “Üçüncü zəng”, Bursa Dövlət Teatrının “Sarıpınar”, İran İnruzha Teatr Birliyinin “Quraqlıq və yalan”, Mersin Dövlət Opera və Balet Teatrının “Çalıquşu”, Van Dövlət Teatrının “Ay işığı sirki”, İzmir Dövlət Teatrının “Sonuncu qışqırıq”, Eskişehir Böyükşehir Bələdiyyəsi Şəhər Teatrının Yalan dünya”, Kenter Teatrının “Seçilmiş hekayələr”, Rumuniya Passe-Partout Teatrının “Biz ikimiz”, Teatr Kedi “Mənə əsməyi öyrət” tamaşaları da daxildir.

Sabançı vəqfinin, Türkiyə Cümhuriyyətinin Mədəniyyət və Turizm Nazirliyinin və Dövlət Teatrları Baş Müdirliyinin təşəbbüsü ilə keçirilən Sabançı Beynəlxalq Adana Teatr Festivalı nəinki Türkiyədə, eləcə də dünya teatr məkanında tanınan nüfuzlu festivallardandır. Bu il 15 yaşını qeyd edən festivalda bu günə qədər 38 fərqli ölkədən 74 teatr kollektivinin 573 tamaşası nümayiş olunub. Ümumilikdə 5000-ə qədər sənətçinin qatıldığı festivalın 80000-dən artıq tamaşaçısı olub.

• Ariana Qrande ictimai fəaliyyətini dayandırır – Səbəb
• "Mənim kitablarım yandırılmağa layiq idi..." - Alman yazıçıdan sitatlar
• "Deyirlər: dərdi-eşqin adəm öldürməz, dürüstdür bu..." - Xurşidbanu Natəvanın qəzəlləri