İki canlı əfsanə: Silvestr Stallone və Robert De Niro. Birincisi “Rokki”, ikincisi isə “Raging Bull” filmlərində rinqi rəqiblərinə dar etmişdilər. 30 il sonra təkrar hesablaşmaq və hansının daha güclü olduğunu sübut etmək üçün rinqə çıxmalarından bəhs edən “Grudge Match”da (“Böyük maç”)da çəkildi Silvestr və De Niro.

Əfsanələr Türkiyənin “Hüriyyət” qəzetinə danışıblar. Kulis.az həmin müsahibəni təqdim edir.

- Cənab Stallone, məncə rinqdə siz daha təcrübəlisiniz. Hər halda Rokki obrazı ilə 6 filmdə rəqiblərinizi döymüsünüz. Aktyor kimi həyatınızın böyük bir qismi rinqdə keçib.

Silvestr Stallone: - Amma “Oskar” qazana bilmədim. Bu yanımda oturan bəy isə bir dəfə boksçunun həyatını canlandırdı, heykəli dərhal qazandı. Amma haqlısınız, Rokki mənim övladım kimiydi. Az qala öz adımı belə unutdurmuşdu.

- “Rokki-7”ni gözləyən bir kütlə var. Yoxsa, 6-da bitdimi film?

S.S. - Elədir. Rokki təqaüdə çıxdı. Təəssüf ki, “Rokki-7” çəkilməyəcək. Özümdə o gücü görə bilmirəm. İnsan müəyyən bir yaşa gəldikdən sonra qəlibləşmiş qəhrəmanı canlandıracaq taqəti özündə tapa bilmir. Bu arada, xatırladım ki, mənim 67 yaşım var. Çətin qərardır təbii ki. Amma bu qərara hörmət etməliyik. İnanın, “Rokki” həmişə yaşayacaq. Məncə, kino dünyasına gözəl bir miras qoyub gedirəm.

- Bəs “Böyük maç” filmi haqda nə deyə bilərsiniz? Bu film sizin üçün bu yaşda bir meydan oxumaqdırmı?

S.S. – Döyüş filmləri mənə həmişə şöhrət gətirib. İnsanlar yaşlandıqca meydan oxumaq üçün yeni axtarışlara başlayır. Biz Bobla (De Niro) “gəl cəhd edək” dedik. Və burdayıq.

Roberd De Niro: Həyat bir mübarizədir. Doğuşdan ölümə qədər. Boks mənə görə bir yaşam simvoludur. Mən rinqdən kənarda da mübarizə aparan birini canlandırıram. Həyat eyni zamanda mifdir. Özümü “Herakl” filmindəki kimi hiss etdim.

- Bəs yaşlanma barəsində siz də Stallonenin dediklərinə qatılırsınız?

R.N. – Bəli, Silvestr haqlıdır. Vaxt uçur və bunlar artıq kinoda son cəhdlərimizdir...

- Cənab, Stallone, bu yanınızdakı adamı həyatınızda heç qısqanmısınız?

S.S: - Bu bəy, mənim bütün rollarımı oğurlayıb. “Rokki” filmi çıxanda o “Taksi sürücüsü” ilə ortaya çıxdı. Bob inanılmaz dərəcədə soyuqqanlı adamdır. Amma inanın, mənim aktyorluq qabiliyyətim 30 il öncəkinə nisbətən daha yaxşıdır.

- Cənab De Niro, Stallone sizin üçün necə rəqibdir?

R.N: İkimiz də kinoda boksçuları canlandıraraq məşhurlaşdıq. Ondan sonra həyatımızda çox az dəyişikliklər yaşanıb. Amma biz bir-birimizə rəqib olmamışıq. Ən azından mən belə düşünürəm. İlk dəfə “Kopland” filmində yollarımız kəsişdi. O zamandan bəri nə vaxt bir araya gəlsək, yaxşı vaxt keçiririk. Elə deyil, Roki?

- Stallone, siz əslində boksçu da olmusunuz, eləmi?

S.S.- Bəli. İsveçrədə bir kollecdə boks müəllimi olmuşam, amma boksu bilmirdim. Bir gün əsl bir boksçu məni bir yumruqla “nokaut” elədi...

- Həqiqətən özünüzü yaşlı hiss edirsiniz?

S.S.- Təbiətin qanunlarına zidd getmək olmur. Amma özünüzə yaxşı baxsanız, sağlam qala, yaşlanmanı gecikdirə bilərsiniz. Mən bunu etməyə çalışarkən həyəcanımı da itirmək istəmirəm. Yaşlandığımı ancaq filmlər beynimdən çıxara bilir...

- Hər ikiniz italyan əsillisiniz. İtaliyan dilini bilirsiniz?

S.S. – Bəzi sözləri, yemək sifariş verə biləcək səviyyədə.

R.N. – Məndə də pisdir. Əslində daha yaxşı olmalıdır.

- Cənab De Niro, Türkiyədə 6 bölümdən ibarət olan serialda Mövlanəni canlandıracağınız haqda söhbətlər gəzir. Həqiqətdirmi bu?

R.N. – O kimdir? Tanımıram. Mənə heç kim serial təklif etməyib. Zatən seriallarda oynamıram.

S.S. – Bob, indi də Türkiyədən təklif almısan? Məndən gizlədirsən deyəsən. İnanmağım gəlmir!

• Səbinə Hacıyeva: "Azərbaycan maddi və qeyri-maddi mədəni irsin qorunmasına xüsusi əhəmiyyət verir"
• "Təxəyyül dəli bir kirayənişindir..." - Fransız filosofdan sitatlar
• "Xəzan yarpaqlarındakı ölüm mənə bəs edir..." - Amerikalı yazıçıdan sitatlar