Bu günlərdə İstanbulda nüfuzlu “İQ Kültür sanat yayıncılık” nəşriyyatında Azərbaycan yazıçısı Varisin “Son məktub” romanı İmdat Əfşarın tərcüməsində işıq üzü gördü. Bu, yazıçının qısa müddət ərzində Türkiyədə nəşriyyat hüququ ilə çap olunan artıq 3-cü kitabıdır (Ötən ilin sonlarında “Sənə inanıram” və “Yetmiş yeddinci gün” türk oxucularına təqdim edilmişdi).

“Son məktub” Türkiyədə böyük maraqla gözlənilirdi. İlk iki kitabın uğur qazanması (“Yetmiş yeddinci gün” Yozqat Bozok Dövlət Universitetində dərs vəsaiti kimi təsdiq edilib), üstəlik “Son məktub”da hadisələrin İstanbulda cərəyan etməsi türkiyəli oxucular arasında əsl ajiotaj yarada bilib. Hətta yeni romanın çıxacağı ilə bağlı Türkiyənin əsas xəbər portallarından olan “Türkiye Habar Ajansı”nda dərc olunan informasiya 100 mindən artıq oxunma sayı ilə ən çox oxunan xəbərlər arasında yer almışdı.

“Son məktub” müxtəlif xalqların nümayəndələrinin saf sevgi hisslərindən və bu saflığa qənim kəsilmiş şər qüvvələrdən bəhs edir. İngilis gənclərinin qovuşmasına 1940-cı ildə Koventrinin almanlar tərəfindən bombalanması, pakistanlı gənclərin qovuşmasına 1958-ci ildə general Əyyub Xanın həyata keçirdiyi hərbi çevriliş, azərbaycanlı və türk gənclərinin qovuşmasına isə müvafiq olaraq 1992-ci ildə baş vermiş Xocalı qətliamı və 1998-ci ildə Şırnak bölgəsindəki PKK terroru mane olur.

Romanda İstanbul şəhərinə Sultan Süleyman dövründən bu günədək bələdçilik edilir, eləcə də ölkədə dini tolerantlığın hökm sürməsi, Şimal Kiprin ixtilaf mənbəyinə çevrilməsi səbəbləri yer alır, Türkiyə balet sənətinin tarixinə toxunulur.

“Son məktub” dünyanın ən böyük universitet kitabxanası sayılan Birmingem Universiteti kitabxanasının əsas fonduna daxil edilib.

Hazırda “Son məktub” Türkiyənin 850 satış nöqtəsində satışa çıxarılıb.

• Montrö Klassik Musiqi Festivalında Azərbaycan Mədəniyyət Günləri - İlk dəfə
• Amerikalı aktrisa “Qızıl İkona” mükafatını qazandı
• Səs maşını - Roald Dahlın hekayəsi