Milçəyin dəfninə 1 milyon dollar xərcləyən şair

Milçəyin dəfninə 1 milyon dollar xərcləyən şair
6 fevral 2014
# 09:00

Hər yazıçının ilham mənbəyinə ehtiyacı var. Çoxları ilham üçün, başlarını qatmaq məqsədilə, yaxud elə tarix kitablarına həqiqətən qəribə və fərqli biri kimi düşmək üçün ev heyvanları saxlayıblar.

Antik yunan şairi Vergili milçək saxlayırmış. Hətta milçəyin cənazəsinə bu günün pulu ilə təxminən bir milyon dollar xərcləyib. Cənazədə orkestr ifa edib, balaca məzar qoyulub.

Romantizm cərəyanının ən məşhur simalarından olan fransız şair Cerard de Nerval xərçəng saxlayırmış. Onu tez-tez Paris küçələrinə gəzintiyə çıxararaq: “Xərçənglər əla ev heyvanıdırlar, dənizin sirlərini bilən, hürməyən, sakit və ciddi məxluqlardır”, - deyirmiş. Nerval 1841-ci ildə ağlını itirib.

Viktoriya dövrünün şairi Elizabet Barrett Brauninqin Fluş adlı qızılı ispan iti varmış. Fluş sonralar Virciniya Vulfun yazdığı “bioqrafiya”nın mövzusu olub. Brauninq itin xatirəsinə “Fluşa” adlı şeir yazıb, hətta xəstələndiyi dövrdə vaxtını keçirmək üçün itə stolüstü oyunlar oynamağı da öyrətməyə çalışıb.

Viktoriya erasına aid daha bir qələm adamı Corc Eliot da itləri sevirmiş. Bir dəfə aldığı qonorarın hamısını itinə xərcləyib.

Ernest Heminquey isə pişikləri sevərmiş. Yazıçının 30-dan çox altı barmaqlı pişiyi olub. Görünür, “Heminquey pişikləri” ifadəsi də oradan yaranıb. Pişiklərinə verdiyi adlar qəribə olub: Alley Cat (küçə pişiyi), Boise, Crazy Christian (Çılğın xristian), Ectracy, Friendless Brother (Dostsuz qardaş), Fats, F.Puss, Furhouse (Kürk evi), Pilar (Sütun), Thruster (İtici), Whitehead (Ağ baş) və Uilli (arqo deyimlə, penis).

Mark Tven pişiklərə ad qoymaqda Heminqueyi kölgədə qoyub. Müxtəlif vaxtlarda evində saxladığı pişiklərin adları beləydi: Buffalo Bill, Satan (Şeytan), Sin (Günah), Sour Mash (Turş püre), Tammany və s.

Ədəbiyyat dünyasının ən böyük pişiksevəri ingilis şair Tomas Sternz Eliotdur. Pişiklər haqqında kitab yazıb, məşhur “Cats” müziklının ilham mənbəyi olub.

Amerikan şairə Doroti Parkerə bir gün iki timsah balası hədiyyə ediblər. Timsahlarla nə edəcəyini bilməyən Parker onları hamamda su ilə dolu vannaya qoyaraq gedib. Səhəri gün qulluqçusunun yazdığı belə bir qeyd görüb: “Əziz xanımım, işdən çıxıram, çünki timsah olan evdə işləyə bilmərəm. Bilsəydim bunu sizə əvvəlcədən deyərdim, amma bu barədə heç nə deməmişdiniz”.

Günel Əsgərzadə

# 2135 dəfə oxunub

Oxşar xəbərlər

# # #