news-inner
clock11:01 calendar-gray 27 Avqust 2013 view-gray1035 dəfə oxunub
view-gray1035 dəfə oxunub

Sədnik Paşa ilə ilk və son görüş

Onunla görüşə gedəndə çox həyəcanlıydım. Sözün açığı, heç söhbətə də hazır deyildim, hardan, nədən başlayacağımı, ona hansı sualları verəcəyimi də bilmirdim. Yol boyu özümü qınayırdım, bu qədər məsuliyyətsizlik olmaz, deyirdim. Sənin müsahibə götürəcəyin insan Azərbaycan folklorşünaslığının sütunlarından biridir, onunla həmsöhbət olmaq üçün yazdığı kitablardan ən azı, ikisini, üçünü oxumaq lazım idi.

Amma artıq gec idi. Biz Gəncə Dövlət Universitetinə yaxınlaşırdıq. Çoxillik təcrübəmə güvənib özümü tox tutmağa çalışdım.

İlahi, o, nə qədər sadə adam imiş!.. Duzlu-məzəli zarafatlarıyla, yaşına yaraşmayan şuxluğu ilə söhbətə elə körpü saldı ki, həyəcanım büsbütün sovuşdu.

84 yaşlı alimin iti yaddaşı, sağlam məntiqi, rəvan nitqi məni heyrətə gətirmişdi. Qocaman folklorşünas söhbəti çox uzaqlardan gətirdi, uşaqlığından, tələbəlik illərindən, jurnalist fəaliyyətindən yerli-yataqlı danışdı, mən isə sakitcə onu dinləyirdim. O, ömrünün tam 60 ilini folklorşünaslığın tədqiqinə həsr edib, 70-ə yaxın kitabı nəşr olunub. Yarım əsrdən çox müddətdə yorulmaq bilmədən xalq əfsanələrinin, əsatirlərinin, nağıllarının toplanıb nəşr edilməsi işi ilə məşğul olub. Sədnik müəllim Azərbaycan xalq əfsanələri və əsatirlərini küll halında ilk dəfə toplayıb nəşr etdirən və tədqiq edən alim idi. O, yeriyən ensiklopediya idi. Təkbaşına bir universitetin görə biləcəyi işi görmüşdü və bütün bunları heç bir təmənna güdmədən etmişdi.

Həmin unudulmaz görüşdə Sədnik müəllim heca vəzninin yaranmasıyla, inkişaf tarixiylə bağlı son dərəcə maraqlı fikirlər söylədi. Heca vəznli şeirin yazılı ədəbiyyatımızdan çox-çox əvvəl şifahi xalq ədəbiyyatı daxilində inkişaf və təkamül yolu keçdiyini Sədnik müəllim fakt və dəlillərlə bizə izah edirdi, fikrini əsaslandırmaq üçün xeyli sayda bayatı və qoşmalardan sitat gətirirdi. Şövqlə danışırdı və onun sözünü kəsməyə cəsarət etmirdim. Söhbət əsnasında müşahidə etdim ki, kompüter arxasında əyləşmiş qızlar onun çapa hazırlanan növbəti kitabının əlyazmasını yığırdılar və arada özü də yerindən qalxıb qızların işinə nəzarət edir, hardasa düzəliş etməyi tapşırır, əlyazmanı dönə-dönə nəzərdən keçirirdi. Sinninin bu çağında bu qədər enerjiylə çalışan, iş başında olan, həyat eşqiylə dopdolu insanı ancaq fədai adlandırmaq olar. Elm fədaisi.

Sədnik müəllimin ömür yolu gənclərə örnək ola bilər. Necə yaşamağı, necə çalışmağı, necə yazmağı ondan öyrənə bilərik. İndən belə kitabları bizi öyrədəcək, özü isə yaxşı tanıdığı dünyanın yolunu başa vurub nəhayət ki, mənzil başına çatdı...

İndi çox peşmanam ki, o söhbəti yazıya köçürə bilmədim və o, sağlığında bu son müsahibəsini oxuya bilmədi. Məndən asılı olmayan səbəblər də oldu... Qismət deyilmiş. Amma həmin söhbətin videoyazısı qalır. Təxminən bir saata qədər çəkən söhbətimiz yəqin ki, nə vaxtsa yazıya alınacaq. Amma o videoyazı mənim üçün ona görə qiymətlidir ki, özümü Sədnik müəllimin ömrünün son günlərinə çatdıra bildim və canlı ünsiyyətimiz baş tutdu. Bu ilk və son görüş mənim həyatımın ən unudulmaz və işıqlı xatirəsi olaraq qalacaq...

Ruhun şad olsun, böyük insan!

news-inner-user
Kənan Hacı

193 məqalə

Oxşar xəbərlər

Xəbər lenti

Xalq artisti Rafiq Hüseynovun film kimi həyatı - Maraqlı faktlar
21:00 04 Avqust 2021
Amerikalı vokalçının “Qarabağ Azərbaycandır” klipinin təqdimatı keçirilib
18:45 04 Avqust 2021
Yanğın “Rəcəb İvedik”in evinə yaxınlaşdı – Qalmaqal düşdü
18:01 04 Avqust 2021
Onda mən də doyunca ağlaram - Güneydən hekayə
17:20 04 Avqust 2021
Könül Kərimova gileyləndi: "Nəfəsimiz kəsildi”
16:37 04 Avqust 2021
Varisin romanı Türkiyədə çap olundu
15:55 04 Avqust 2021
Valideynlərindən icazəsiz evləndi, içki ailəsini dağıtdı, intim videosu yayıldı – Anar Nağılbazdan 10 fakt
15:00 04 Avqust 2021
41 yaşını qeyd edən kəlbəcərli şair: “Elə ən çətini də budur” - Müsahibə
14:20 04 Avqust 2021
Anar: “Məndən Təhminənin telefonunu istəyirlər”
13:30 04 Avqust 2021
Belarus qızı ovlamaq istəyirdim, dənizdə boğuldum – Gənc yazarın Antalya xatirəsi
12:30 04 Avqust 2021
Gənc rəssamlar üçün ustad dərsləri - Ödənişsiz
12:03 04 Avqust 2021
Azərbaycanlı şair Türkiyədəki yanğına şeir yazdı – Mətn
11:12 04 Avqust 2021
Atam öləndə mənə "iş" tapan müəllimim - Ayxan Ayvaz yazır
10:47 04 Avqust 2021
Yazıçı həmkarını sərt tənqid etdi: “Fiaskodur!”
10:03 04 Avqust 2021
İspanca çıxan “Nəsimi poeziyası” kitabı təqdim olunub
09:37 04 Avqust 2021
Sən əvvəl qoymurdun sevəm səni – Nərmin Kamaldan yeni şeirlər
09:01 04 Avqust 2021
Falçı ona cavan öləcəyini söyləmişdi – Zərdüşt Şəfinin kədərli həyatı
21:00 03 Avqust 2021
Milli Qəhrəman haqqında sənədli film çəkilib
19:00 03 Avqust 2021
Anar Kərimov Yunus Əmrə İnstitutunun nümayəndə heyətini qəbul edib
18:41 03 Avqust 2021
İki dil bilmək uşaqların nitqinə ziyandırmı?
18:21 03 Avqust 2021