“Həqiqət odur ki, kişisizəm mən”

“Həqiqət odur ki, kişisizəm mən”
14 avqust 2013
# 11:54

Kulis.Az amerikan şair Lenqston Hyuzun iki şeiri təqdim edir.

50-50

Tək-tənhayam bu dünyada o dedi,

Yatağımı bölüşməyə yoxdur heç kəsim,

Əlimdən tutmağa yoxdur sevgilim,

Həqiqət odur ki,

Kişisizəm mən.

Böyük Oğlan açdı ağzını, dedi:

Dərdin odur ki,

Sənin yoxdur başın!

Əgər olsaydı ağlın, işlətsəydin başını

Olardım mən yanında

Bütün ömrün boyunca.

O soruşdu, bəs nə edim mən onda?

O dedi,

Əvvəl bölüş yatağını,

Sonra pulunu.

Arzuladığım dünya

Arzusundayam elə dünyanın ki, heç bir insan

Başqasına nifrət etməsin,

Sevgi qonsun hər yerə

Hər tərəfi sülh bəzəsin.

Arzusundayam elə dünyanın ki, hamı

Qovuşa bilsin şirin azadlığa,

Xəsislik korlamasın heç bir ürəyi,

Acgözlük qaraltmasın günlərimizi.

Arzusundayam elə dünyanın ki, həm qara, həm ağ,

Hansı irq olursa-olsun,

Dünya nemətini bölüşə bilsin,

Hər kəs özünü azad hiss etsin.

Bədbəxtlik sallasın başın aşağı,

Sevinc isə bir mirvaritək

Çevrilsin bəşərin incisinə.

Bax belə dünyanı mən istəyirəm!

İngiliscədən tərcümə: Svetlana Turan

# 855 dəfə oxunub

Oxşar xəbərlər

# # #