Kulis.az saytının baş redaktoru, yazıçı Qan Turalı həmkarı Həmid Herisçinin verdiyi müsahibədə onun rəhbərlik etdiyi saytın ünvanına ittiham səsləndirməsinə cavab olaraq, musavat.com-a yazı göndərib.

***

"Konspirologiyanın hər cür elmilikdən, rasionallıqdan kənar təmayül olması mənim kəşfim deyil. Bu barədə bütün ensiklopediyalarda yazılıb. Həmid Herisçi uzun müddətdir konspirologiyaya meyl edir. Konspiroloji təfəkkürün mühüm bir prinsipi də insanın özü haqda miflərə inanmasıdır. O, “Yeni Müsavat” qəzetində çap edilmiş müsahibəsində Qamət Süleymanovu və Kulis.Az-ı nəzərdə tutaraq, fəaliyyətlərini sifarişlə gerçəkləşdirən iki əks qütbün “Gizli Azərbaycan” verilişinə qarşı birləşdiyini iddia edir. Üstəlik də Kulis.az-ı ateizm təbliğatında ittiham edir.

Kulis.Az mədəniyyət portalıdı, nə dinin, nə də ateizmin təbliğatı ilə məşğul olur, dinə münasibəti də loyaldır. Qamət Süleymanov, eləcə də Hacı Şahin Kulis.az-a müsahibələr verir, fikirlərini bölüşürlər. Lakin Həmidin özü haqqında mifi o qədər böyükdür ki, sələfi Qamət Süleymanovla ateizm təbliğatçısı saydığı Kulis.az-ın ona qarşı birləşdiklərini deyir. Nə boyda qüvvəymiş bu “Gizli Azərbaycan” ki, ona qarşı bütün cəbhələr ittifaq bağlayıb müharibəyə başlayıblar.

Mən hazırda üzərində işlədiyim romanda da Orta Əsr mövzusuna yer ayırmışam. Sufi mistikası romanın əsas ideya xətlərindən biridir. Həmid məyus olsa da mən müqəddəsliyə də inanıram, mistikanı da ədəbiyyat hadisəsi hesab edirəm. “Gizli Azərbaycan” verilişinin də əleyhinə deyiləm, sadəcə mövzuya yəni pirlərə bu cür yanaşmanı düzgün saymıram. Həmid bu verilişdə nəinki sünni və şiə olmasından asılı olmayaraq klassik islamın pirə münasibətinə ziddi fikirlər söyləyir, hətta pirlər haqqında xalq arasında olan inancları da öz ədəbi təfəkkürü ilə təhrif edir. Onun pirlər haqqında özünün quraşdırdığı əhvalatlara mən xalis ədəbiyyat nümunəsi kimi baxıram, nəinki pirlər haqqında araşdırma kimi. Həmid Herisçi isə araşdırma aparmaq, məsələni mənəvi və tarixi planda şərh etmək əvəzinə mövzuya öz bədii fantaziyası ilə yanaşır. Biz bu zaman tarix əvəzinə Həmidin ssenarisini yazdığı bədii filmə baxırıq. Bu isə araşdırma deyil, öz subyektiv mülahizələrinin həqiqət adına xalqa satılmasıdır".

• Arabaçı - Sabir Əhmədlinin hekayəsi
• Tramp müğənni ilə fotolarını paylaşdı - Tənqid olundu
• "İçərişəhər” Dövlət Tarix-Memarlıq Qoruğu İdarəsinin strukturu yeniləndi