- Hara gedirsən?
- Corata.
- Qutab yeməyə?
- Hə qutab üçün gedirdik, amma, onun bişirilməsini, süfrəyə verilməsini çəkmək üçün...
Bakı kəndlərini yaxşı tanıyırsınızsa, demək Coratı və onun məşhur qutabını da tanıyırsınız. Coratsız qutabı, qutabsız Coratı təsəvvür etmək çətindir.
Coratın dəniz sahili kafelərində mövsümdən və istəkdən asılı olaraq dəvə, mal əti, göy, qarın, ciyər, pendir, balqabaq ilə hazırlanmış qutab yemək olur. Dəvə əti Maştağadakı ticarət mərkəzlərindən alınır. Müştərilər bu kafeləri qutaba görə tanıyır. Bir də buranın pürrəngi çayı təkrarsız olur...
Deyilənə görə qutabı restoran mətbəxinə Coratlı Gülağa gətirib. Əvvəl təndirdə bişiriblər. Təndirdə bişəndə qutablar nisbətən böyük olurmuş. Sonra kürədə bişirməklə restoranlarda tələbatı daha rahat ödəyiblər. Kürədə daha çox qutab bişirmək mümkün olur. O zamandan qutabların ölçüsü də kiçilib indiki kimi olub.
Coratın dəniz sahili kafeləri də Coratlı Gülağanın olub. İndi isə burda kafelər, restoranlar saya gəlmir. Xoş istirahətlər!