“Mən bir neçə gün öncə dəfn mərasiminin təşkili üçün hazırlıqlar görürdüm. İyun ayının 13-də Fransada dəfn olmalı idi. Azərbaycandan və dünyanın bir çox ölkələrindən Toğrulu sevənləri mərasimə dəvət etmişdim. Bu gün səhər mənə xəbər verdilər ki, Əsmər Nərimanbəyova məhkəməyə müraciət etdiyi üçün dəfn mərasimi təxirə salınıb”. Bu sözləri APA-ya açıqlamasında xalq rəssamı Toğrul Nərimanbəyovun ikinci həyat yoldaşı Sevil Nərimanbəyova deyib.

Sevil Nərimanbəyova Əsmər Nərimanbəyovanın atası ilə münasibətlərinin yaxşı olmadığını deyib: “Bütün onun haqqında çəkilən sənədli filmlərdə, verilişlərdə həmişə deyirdi ki, mənim bir oğlum var o da Fransua Mirtoğrul Nərimanbəyovdur. Qızı ilə münasibətləri isə mənə qədər artıq korlanmışdı. 1982-ci ildən qızıyla danışmırdı. 25 ildə bir dəfə də olsun qızına zəng etməyib. Cəmi beş dəfə təsadüfən tədbirlərdə görüşüblər. Əsmərin bir oğlu bir qızı var, Toğrul isə onları heç tanımırdı, bir dəfə də görməmişdi”.

S.Nərimanbəyova rəssamın Fransada dəfn olunmaq arzusunda olduğunu deyib: “Qızı mənim acığıma yalandan deyir ki, guya Toğrul vəsiyyət edib ki, onu Azərbaycanda dəfn etsinlər. O arzulayırdı ki, Fransada dəfn olunsun. Çünki qohumlarının əksəriyyəti burada yaşayır, hətta burada dəfn olunanları da var. Sağlığında xahiş etmişdi ki, onun üçün vəsiyyətnamə hazırlayım. Amma mən buna ürək etmədim. Əgər məhkəmə Toğrulun Azərbaycanda dəfn olunmasına qərar versə, pis olacağam. Hətta oğlum olmasaydı, intihar belə edərdim. Bir şeyi də qeyd edim ki, əgər dəfn mərasimi Azərbaycanda olarsa, ora gələ bilməyəcəyəm. Çünki qızından qorxuram. Məni dəfələrlə hədələyib. Bilsəydim qızı başıma belə oyun açacaq, ölüm xəbərini gizlədərdim”. Rəssamın xanımı qeyd edib ki, məhkəmə prosesi sabah səhər saatlarında keçiriləcək.

Azərbaycan Rəssamlar İttifaqının sədri Fərhad Xəlilov APA-ya açıqlamasında sabah Fransaya getmək üçün aldığı bileti geri qaytardığını deyib: “Mənə deyilmişdi ki, dəfn mərasimi sabah Fransada olacaq. Mən də bilet almışdım. Günorta saatlarında mərasimin təxirə salındığını öyrəndim və bileti geri qaytardım”.

• Madriddə MAMA “Ana təbiət” beynəlxalq incəsənət sərgisinin açılışı oldu
• Xalq artisti Şəfiqə Məmmədova: "İttifaq daxilində bir çox çətinliklər var"
• Yaxınlarını nasist ölüm düşərgələrində itirən yazıçı - O, niyə "dərkolunmaz varlıq" motivini yaratdı?