Xalq artisti, bəstəkar Arif Məlikov eks-prezident Əbülfəz Elçibəyin ona bağışladığı Qara Qarayevin portretini Musiqi Mədəniyyəti Muzeyinə təqdim edib. Bu barədə Kulis.Aza Arif Məlikovin özü məlumat verib.

Arif Məlikov deyib ki, dövlət ziyafətlərindən birində eks-prezident Əbülfəz Elçibəyə dahi Qara Qarayevin portretini hədiyyə ediblər: “Elçibəy isə dedi ki, bu məclisdə həmin hədiyyəyə layiq olan bir adam var, mən də portreti ona hədiyyə etmək istəyirəm. Məni çağırıb Qara Qarayevin portretini təqdim etdi. Portret mənim Musiqi Akademiyasındakı beş il təhsil aldığım, sonra daha əlli beş il dərs dediyim sinif otağında divardan asdırıldı. Bina təmir olunanda portret yoxa çıxdı, çox axtardıq, nəhayət tapdıq və apardım onu evimə”.

Arif Məlikov bildirib ki, portreti Musiqi Mədəniyyəti Muzeyinin əməkdaşlarına təqdim edib: “Biləndə ki, bunu bağışlayıb əvəzində onlardan heç nə ummuram, çox təəccübləndilər. Akt tərtib edib portreti onlara təqdim etdim”.

Tahir Tahirovun yağlı boya ilə kətan üzərində işlədiyi portret Qara Qarayevin gənclik illərinin təsviridir. Bəstəkarın gəncliyini təsvir edən başqa portret yoxdur.

• "Cırtdan" Şuşa Teatrının səhnəsində
• Almaxanım: "Onlar hər kəsi təhqir edən klaviatura canavarlarıdı" - Müsahibə
• Oğurluq edən Kərbəlayi - Nəcəf bəy Vəzirovun qısa hekayəsi