news-inner
clock17:12 calendar-gray 09 Avqust 2021 view-gray436 dəfə oxunub
view-gray436 dəfə oxunub

Pulları çiçəklərə çevirə bilsəydik... - Allahşükür Ağanın şeirləri

Kulis.az Allahşükür Ağanın şeirlərini təqdim edir.

Əgər

Pulları çiçəklərə çevirə
bilsəydik,
Deyərdim, xanım qız,
mənə 10 dəstə çiçəyə
bir qadın paltosu verin.
Bu qış mənim sevgi fəslimdir.

O vaxt deyərdilər ki,
Müəllimlərin maaşı yüz dəstə çiçəkdir.
Çörək bir çiçək,
İşıq pulu bir ləçək
Pulları çiçəklərə çevirə bilsəydik,
sevgi azalmazdı, əsla.

Qəribə xasiyyətim var...

Axşam – səhər kinolara baxıram
Təyyarə və gəmi qəzasına.
Ya da pələnglərin
Ceyranları parçalamasına...

Mənə deyirlər,
Nə daş ürəyin var.
Ya beyninə qan sızar,
Ya ürəyin dayanar.

Belə şeylərə baxma,
Kompüteri bağla.
Get həyətdə
Bir doyunca ağla.

Deyirəm hardan biləsiniz
Nə çəkirəm, nə?
Həmin faciələrdə
Mən də ola bilərəm -
Çıxış yolu axtarıram.

Oxu əllərimi

Əllərim ağappaq dəftər vərəqi,
Əlindən əlinə vərəqləyirsən.
Bəlkə falçı kimi baxıb əlimə,
Quzu taleyimi mənə deyəsən.

Oxu əllərimi, oxu doyunca,
Bəlkə öyrənəsən onun dilini.
Əlimin qızılı üzüyü deyə,
Əlimə çəkmişəm çölün şəklini.

Oxu əllərimi aç ürəyincə,
Orada nə qədər əllər sıxmışam.
Oxu əllərimi tapasan deyə,
Sənin yaylığını oğurlamışam.

İtirmək qorxusu bitir əlimdə,
Yelləncək həvəsi bitir əlimdə.
Bir körpə gülüşü itir əlimdə,
Oxu əllərimi aç vərəq-vərəq,
Əlimdə taleyim çiçəkləyəcək.

Güllə

O günü torpaqda lalə qızardı,
Utana – utana baxdı lalələr.

Bir qarış torpaqda bahar ağladı,
Arzunu, sevgini güllələdilər.
Milyonlar qalxaydı o gün ayağa,
Bir barmaq nə idi, ləngidəydilər,
Bir güllə nə idi, söndürəydilər.

Yağdı ürəyindən lalə yağışı,
Torpağın sinəsi islandı güllə.
Şair sorağında gəzir dünyanı,
Dantesin Puşkinə atdığı güllə.

Qəbiristan yolları

Qəbiristana gedən yollar,
Ot bitirsə, gözəl olar.
Burda ayaq izi də
Quruyar xəzəl olar.

Qəbiristana gedən yollar,
Gecə-gündüz səs daşıyır.
Dolanıb başdaşlarına,
Bir cığır qəfəs yaşayır.

Neçə ayaq izi ölüb,
Qəbiristan yollarında.
İzləri otlar qaldırıb,
Tabut kimi qollarında.

Uzaqlar

Hərdən elə olur ki, bəzən
çıxam gedəm uzaqlara,
buralara gəlməyəm.
Heç şeir də yazmayam,
yerimi nişan verməyəm.

Uzaqlar mənə şirindi,
Uzaqdadır arzular.
Görürsən ki, uzaqlardan yazır şairlər,
Arzularını dan üzünə yazırlar,
Qəribə burasıdır ki,
Gözləyirlər uzaqların
Bu yaxınlarda
Bakıya gəlməyini...

Uzaqlardadı
Kitablarımın capı,
Uzaqlardadı duz rəngində
Saçlarım,
Nəvələrim,
Deputat olmaq arzularım.

Bəlkə uzaqların qabağını kəsiblər
Qoymurlar Saatlıya gəlməyə
Qoymurlar məni tapmağa.
Bəlkə mən çıxım gedim uzaqlara,
Kim bilir elə bəlkə
Bir santimetr aralıdan,
Uzaqlıq gəlib keçib yanımdan.
Məni oyatmayıblar,
“Bu zalım dostlar,
Zalım adamlar”.

Bağban

Gül açılanda bağban ölür,
Nə qəribə misradır,
Görən güllər, meşələr,
Neyləyir bağban öləndə?
“Səhər-səhər bağa girdim
Nə bağ bildi, nə də bağban”.
Bağban niyə bilməsin ki,
“Əl üzadıb bir gül dərdim”,
Bağban niyə bilməsin ki...
Hanı bağban, bəlkə yatıb,
bəlkə ölüb?
“Nə bağ bildi, nə də bağban”,
Bəlkə çiçək olub, yarpaq olub
Bəlkə dönüb torpaq olub?
Nə qəribə dünyadı,
Bağban öldü,
Üstünə gül tapılmadı,
“Nə bağ bildi, nə də bağban”.

Oxu, şairim

Şair, səhər-səhər bir durna köçünə əl eyləsən,
Vaqifin ruhuna vaqif olarsan.
Dizlərini yerə qoyub bir çiçək ləçəyinə əyilsən,
Bir roman oxumuş kimi ayağa durarsan.

Yoxsa sənin oxuduğun xarici romanlar
Kimi şair eylədi deynən?
Səhər-səhər dur bax, gör çay necə tələsir,
Onu kim, çağırır,
Bir məna ver, öyrən,
Bir çay romanı oxumuşam deynən, dostlara.

Get bazara bax, adamların üzlərinə, gözlərinə
Gör nə qədər yorğundular.
Elə bil min dəfə oxunmuş romandılar.
Köhnə, cildləri cırılmış kitabdılar.
Dünya ilə çəkilmiş haqq-hesabdılar.
Oxu şairim, bu adamlar xaricdən gəlməyiblər,
Sənin qonşularındı.

Oxu, o saat biləcəksən
Birinci hansı intihar edəcək?

Ay dünya…

Güllə varsa, açılacaq,
Bəs indi biz neyləyək?
Bir əlimizdə bayraq, birində güllə,
Bir əlimizdə quran, birində güllə,
Bir əlimizdə uşaq əli,
Birində güllə,
Biz kimi qoruyuruq, İlahi, kimi?

Taxıl əkirik, tank düzəldirik,
Məktəb tikirik, top düzəldirik,
Dərs söyləyirik, düşmən göstəririk,
Kimi aldadırıq, kimi, İlahi?
Biz neyləyək,
Kimin yanında duraq?
Deyəsən, dərs qurtardı, zəng çalındı,
Bəlkə… dünyadan çıxaq?

Əsgər

Davanın şirin yerində
Qarşı təpədən
Bir əsgər qəfil
Papağını atdı göyə,
Biz hələ səngərdəydik,
Osa özünü vururdu göyə.
Qaça- qaça,
Uça-uça gəlirdi,
Ağlayırdı,
Gülürdü.
Çıxarıb pencəyini
Yağışın ağzına atdı.
Əynində nə vardı
Hamısını islatdı,
Gölməçəyə uzandı,
Palçıqda batdı.
Nə vardı əynindən
Çıxarıb palçığa atdı.
Bir dəri qaldı,
Bir sümük,
Bir də ağzında səs.
Qaçırdı bizə tərəf,
Biz nə bilək, nə deyir,
Gah yıxılır,
Gah yüyürür,
Gah yeriyir.
Ağzında bir səs qalıb
Bir dənə də söz,
Müharibə qurtardı - dedi.
Başladı oynamağa
Ay alagöz, alagöz...
Oğulsansa gəl buna döz.

news-inner-user

19962 məqalə

Oxşar xəbərlər

Xəbər lenti

Los Ancelesdə Üzeyir Hacıbəyliyə həsr olunmuş qısa film hazırlanıb - Video
17:00 18 Sentyabr 2021
Üzeyir Hacıbəyovun vida mərasimindən reportaj - Fotolar
16:30 18 Sentyabr 2021
Milli Musiqi Günü ilə bağlı Bakı Musiqi Akademiyasında tədbir keçirilib - Fotolar
15:31 18 Sentyabr 2021
Şuşada ilk dəfə Milli Musiqi Günü keçirilir - Fotolar
14:36 18 Sentyabr 2021
Yaqub Zurufçu xanımından niyə boşanmışdı? - Video
13:30 18 Sentyabr 2021
Mədəniyyət naziri: “Şuşaya onun ruhunu qaytaracağıq”
12:40 18 Sentyabr 2021
Fərhad Bədəlbəyli: "Artıq bu, həqiqətdir”
12:29 18 Sentyabr 2021
Üzeyir Hacıbəylinin məzarı ziyarət olunub - Fotolar
11:30 18 Sentyabr 2021
Nazirliyin bəstəkarlara vurduğu zərbə - Firudin Allahverdi yazır...
10:34 18 Sentyabr 2021
Cümhuriyyət ərəfəsində Üzeyir Hacıbəyovu İranda qalmağa vadar edən nə idi? – Vilayət Quliyev yazır
09:01 18 Sentyabr 2021
1937-ci ildə həbs edildi, sevdiyi qadını güllələdi, oğlunun boş tabutunu basdırdı... - Bağırov haqqında qeyri-adi faktlar
21:00 17 Sentyabr 2021
Azərbaycanlı skripkaçı birinci yerə çıxdı
19:16 17 Sentyabr 2021
"Arşın mal alan” Çində təqdim olunub - Fotolar
18:45 17 Sentyabr 2021
Məşhur İspan yazıçısı vəfat etdi
18:15 17 Sentyabr 2021
Azadlıq qılıncların oxuduğu nəğmədi – Rüstəm Behrudinin şeirləri
17:30 17 Sentyabr 2021
Təşəkkür edirəm ayaqlarımın səsinə - Yeni şeirlər
17:07 17 Sentyabr 2021
Sezen Aksudan yeni mahnı - Video
16:55 17 Sentyabr 2021
Məşhur tarzənə ev verildi
16:17 17 Sentyabr 2021
Bir sıra mədəniyyət işçilərinə fəxri adlar verildi - Siyahı
15:50 17 Sentyabr 2021
Deşikli daş pirinin möcüzəsi: İnanaq, yoxsa gülüb keçək?
15:30 17 Sentyabr 2021