Azərbaycan Yazıçılar Birliyinin Gənclər Şurasının iclası keçirilib

Bu barədə Kulis.aza Gənclər Şurasının sədri Fərid Hüseyn məlumat verib.

O, bildirib ki, Azərbaycan Yazıçılar Birliyinin sədri, Xalq yazıçısı Anar Gənclər Şurası ilə bəzi məsələləri müzakirə edib:

“Ədəbi festivalların təşkili, gənc yazarların ədəbi mətbuat orqanlarının redaksiya heyətlərinə üzv qəbul edilməsi, ədəbi tele-layihələr, yay məktəblərinin təşkili, digər dövlət qurumları ilə, habelə özəl təşkilatlarla əməkdaşlıq, regionlarda və paytaxtda oxucularla görüşlərin keçirilməsi, yaradıcı qurumların bir-birinə inteqrasiyası, gənc yazarların əsərlərinin çapı və sair məsələlər müzakirə edildi. Ümumilikdə Gənclər Şurasının üzvləri tərəfindən qırxdan artıq yeni təklif səsləndi. Anar müəllim gəncləri diqqətlə dinləyərək, onların fikirlərinin nəzərə alınacağını, Birliyin imkanları daxilində olan məsələləri həlli yönündə qəti addımların atılacağını vurğuladı.”

Görüşdə Azərbaycan Yazıçılar Birliyin Gənclərlə iş üzrə katibi Rəşad Məcid də çıxış edib, gənclərin təklifləri ilə bağlı fikirlərini bildirib. Eyni zamanda, görüləcək işlərlə bağlı düşüncələrini bölüşüb.

Fərid Hüseyn:

“Daha sonra mən son iki il ərzində gənclərlə bağlı görülən işlər haqda danışdım və artıq reallaşmaq üzrə olan bəzi məsələlər barədə Birliyin sədrinə, katibinə, eləcə də üzvlərə məlumat verdim. Qeyd edim ki, Gənclər Şurasının say tərkibinin artırılması da planlaşdırılır. Artıq növbəti həftələrdən etibarən real işlərin icrasına başlanacaq.”

Daha sonra müzakirələr yekunlaşıb, yekun qərarlar qəbul olunub. Yaxın günlərdə AYB-nin Gənclər Şurasının yenidən toplanmasına qərar verilib.

Sonda Xalq Yazıçısı Anar gənclərə öz tövsiyələrini verib və onlara uğurlar diləyib.

Qeyd ediək ki, müzakirədə AYB-nin Gənclər Şurasının üzvlərindən Cavid Zeynallı, Şahanə Müşfiq, Şəhla Aslan, İntiqam Yaşar, Ruslan Dostəli, Şəhriyar del Gerani, Fuad Cəfərli, Ramil Əhməd, Türkan Turan, Gülnar Səma, Elmin Nuri iştirak ediblər.

• Ceyms Bond roluna yeni namizəd ortaya çıxdı
• Xalq artisti Ramiz Quliyevin qəbirüstü abidəsinin açılışı oldu
• Şuşanın qardaşı Kayseridə şeir kimi üç gün - Yazarların Talas görüşləri barədə qısa təəssürat