Xəbər verdiyimiz kimi dünən Beynəlxalq Buker (International Booker Prize) mükafatı Seneqal əsilli fransız yazıçı David Diopa təqdim olundu. Yazıçı dünyanın ən nüfuzlu mükafatlarından olan Bukerə "Gecə bütün qanlar qaradır" romanına görə aldı.

Xatırladaq ki, Beynəlxalq Buker ingilis dilinə tərcümə olunmuş əsərlər üçün nəzərdə tutulub.

Bəs kimdir David Diop?

İndiyədək hansı uğurlu fəaliyyətləri olub?

Mükafata layiq görülən roman nədən bəhs edir?

Əvvəlcə onu qeyd edək ki, Bukerə layiq görülən romanın orijinal adı “Frère d’âme”dir (“Ruh ekizi”). Onun ingilis dilinə tərcüməsi “At Night All Blood is Black” ("Gecə bütün qanlar qaradır") kimi təqdim olunub.

Roman 2021-ci ildə ingilis dilinə tərcümə olunan ən yaxşı ədəbi əsər kimi seçilib.

Əsəri fransızcadan ingilis dilinə yazıçı-şair Anna Moskovakis tərcümə edib.

Romanda müəllif Birinci Dünya Müharibəsi və müstəmləkəçilikdən bəhs edib. Əsərin qəhrəmanı seneqallı əsgər Fransanın müstəmləkəsi olan bütün digər afrikalılar kimi fransızların cərgəsində savaşır. Müharibə, sevgi və dəlilikdən bəhs edən romanda baş obraz cadugərlikdə ittiham edilir.

David Diop 1966-cı ildə Parisdə anadan olub. O, uşaqlığının kiçik bir hissəsini Seneqalda keçirib, daha sonra Fransaya qayıdaraq təhsilə başlayıb.

İxtisasca filoloq olan David Diopun elmi dərəcəsi də var. O, akademikdir. 18-ci əsr ədəbiyyatının tədqiqatçısıdır.

Diop daha çox yazdığı novellalara görə kimi tanınır.

1998-ci ildən Fransanın Pau Universitetində mühazirə deyən David Diop hazırda həmin universitetin incəsənət, dil və ədəbiyyat departamentinin müdiri.

“1889. l'Attraction universelle” (“1889. Universal Cazibə”) adlı ilk tarixi romanı 2012-ci ildə çap olunub.

55 yaşlı müəllifin Buker mükafatına layiq görülən romanı onun sayca ikinci romanıdır.

2018-ci ildə nəşr olunmuş romanı “Goncour” (“Qonkur”) mükafatına təqdim olunmuş, ancaq əsas mükafatın yox, liseylilər arasındakı səsvermənin qalibi olmuşdu. Həmin vaxt baş mükafata “Onlardan sonrakı uşaqlar” əsərinə görə Nikolya Matye layiq görülmüşdü.

Qeyd edək ki, Qonkur qardaşlarının adına təsis edilmiş “Goncour” Fransanın roman janrı üzrə ən nüfuzlu mükafatıdır.

"Gecə bütün qanlar qaradır" roman ingilis dilinə 2020-ci ilin noyabrında çevrilib. Həmin ildə də Amerikada məşhur “Los Angeles Times” dərgisinin ədəbiyyat üzrə “Fiction Book Prize” mükafatına layiq görülüb.

• Corc Klunidən Donald Trampa istehzalı cavab
• Zaman keçir röyalar və əndişələr arasında... - Günün mahnısı
• Sənin ağac qədər də etibarın yoxdumu, Əlisəmid?! - Günün şeiri