Kulis.az bir vaxtların məşhur müğənnisi olan Rəşid Bədirov haqqında maraqlı faktları təqdim edir.
Vaxtilə Sumqayıtın mədəniyyət saraylarında, Mehdi Hüseynzadə adına şəhər stadionunda tədbir aparıcıları tərəfindən xanəndə Rəşid Bədirovun adı elan olunanda zaldan qopan alqış səsləri ətrafı bürüyürdü.
***
Əslən Göyçaydan olan, gənclik illərində Sumqayıta gəlib, burada böyük məşhurluq qazanan Rəşid Bədirov Sumqayıtın ilk professional, çox sevilən müğənnisi olub. O, şəhərdə keçirilən bütün mədəni-kütləvi tədbirlərin, konsertlərin yaraşığı olub. Sumqayıtda bir toy onsuz keçməyib. Hər kəs Rəşid Bədirovun onun toyunda iştirak etməsi ilə fəxr edib.
***
Onu bütün şəhər camaatı çox yaxşı tanıyırdılar. Pərəstişkarları gözəl səsinin vurğunu idilər. Çox gözəl, yapışıqlı səsi vardı, muğam üstündə boğazları təkrarsız idi.
***
Haqqında çox az məlumat olan xanəndə muğam ustası Əlibaba Məmmədovdan dərs alıb. Əlibaba Məmmədov onun oxuma tərzini, səsini çox sevirmiş.
Dövlət Xalq çalğı alətləri ansamblının müşayiəti ilə yazılmış “Dedim-dedi”, “Nazlana-nazlana”, “İkisi bir boyda gəzən gözəllər”, “Ay qaşı, gözü qara göz”, “Qonaq gəl bizə”, “Gülə-gülə” mahnılarını özünəməxsus şəkildə ifa edib. Bu musiqilər hal-hazırda qızıl fondda saxlanılır.
***
Sumqayıt radio verilişləri redaksiyasında hər həftə Rəşid Bədirovun 30 dəqiqəlik, bəzən də bir saatlıq muğam konserti gedərdi. Onu tarda Sumqayıtın gözəl sənətkarı Ramiz Qarayev, kamançada Zabit müəllim müşayiət edərdi.
***
O zaman Sumqayıtın hər evində radioqəbuledici olduğundan hamı Rəşidə böyük maraqla qulaq asar, toylara dəvət edərlərmiş.
***
Həyat eşqi yüksək, dostcanlı, çox səmimi və mehriban insan olan Rəşid Bədirov həm də maşın alğı-satqısı ilə məşğul olub. Onun müəmmalı şəkildə yoxa çıxmasını və aqibətinin bu günə qədər bilinməməsini məhz bu bizne fəaliyyəti ilə bağlayırlar.
***
Günlərin birində oğlu Rəşad xanəndəni Sumqayıtdan Bakıya yola salır. Digər oğlu isə onu Bakıda qarşılamalı imiş. Necə olursa, nə baş verirsə Rəşid Bədirov Bakıya çatmamış, naməlum şəkildə yoxa çıxır.
***
Deyilənə görə, bu işdə onun paxıllığını çəkən tələbələrindən birinin əli olub. Digər bir versiyaya görə Rəşid Bəbirov kiminləsə zəngləşərək yüksək məbləğdə pulla evdən çıxır. Bakıya, indiki “20 Yanvar” ərazisinə vədələşir, yeni maşın almağa yollanır. Lakin sonradan onun görüş yerinə çatıb-çatmaması haqda heç bir məlumat ala bilmirlər. Onu sonuncu dəfə maşın bazarında görüblər.
Bizi Telegram-da izləyin
t.me/kulis_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
