news-inner
clock21:00 calendar-gray 09 Yanvar 2013 view-gray6071 dəfə oxunub
view-gray6071 dəfə oxunub

Döşlərindən başlayır ölməyə qadın bədəni

Kulis.az Aqşin Yeniseyin “147 dənə sən” yeni şeirlər kitabından üç seçmə şeiri təqdim edir.

Sevgi ən axırda ölür

Yəqin sən də gedəcəksən

Hamının getdiyi yerə.

Mən öz yerimə sadiqəm,

Necə ki, sadiq olurlar,

Ağaclar bitdiyi yerə.

…uzun ömür, can sağlığı.

Bağışla bu uşaqlığı.

Ayrılmaqçün gəl görüşə

Sevginin itdiyi yerə.

Koram, gözüm əllərimdi

…ümidlərdən tuta-tuta,

Arxanca gəlib çıxmışam

Məni tərk etdiyin yerə -

Hamının getdiyi yerə.

Yüz qırx yeddi dənə sən

Sən heç “Nə üçün qanla başlanır qadın?”

romanını oxumusan?

Hardan oxuyasan, heç bu romanı yazan olub ki?

Dünən gecə dostum Salamla araq içirdik,

sevgidən danışırdıq

“18 yaşına çatmayanlara sevgi qadağandır”

- deyirdik

“Sevgi iki nəfər arasına çəkilmiş bərabərlik

işarəsi deyil,

Bərabərsizlik işarəsidir” – deyirdik

“İki nəfər arasındakı yeganə bərabərlik təklikdir”

- deyirdik

“Bərabərlik işarəsi riyaziyyat elminin fırıldağıdır,

Həyatda bərabər olan iki heç nə yoxdur”

- deyirdik

Rus arağı içirdik.

Sən heç öz evciyində gildən insan düzəldən

balaca tanrı görmüsən?

Bu gün evdə darıxdım, qalxıb yüz qırx yeddi

dənə “sən” saydım

Yüz qırx yeddi dənə sən

Biz bir yerdə olanda heç bu qədər çox deyildin

Nəsə bir az, az idin

Küləkli havada ağzımda xırçıldayan

qum dənəsi qədər az.

Mənim evim yox idi

Mənim dörd küncüm var idi, hər küncdə bir

hörümçəyim var idi

Başımın üstündə bir damım var idi

Bir qapım, iki pəncərəm var idi,

sən gələnə qədər.

Sən gələndə mən tək idim, pivə içirdim

Nəfəsimdə qurudulmuş duzlu balıqlar üzürdü

Yalnız sənin bədənin idi, mənim təkliyimin

maya dəyəri

Yalnız sənin bədənini ödəyib

Satın almaq olardı mənim təkliyimi

Öz mayasına satdım sənə təkliyimi

Sən gələndə mən tək idim, nənəmi düşünürdüm

Sən gələndə nənəmin gözləri bizi

çoxdan unutmuşdu

Nənəmin gözləri tək qalmışdı

Onun iynəsini saplayan biz çocuqlar

Bu qoca arvada gözlərindən girib çıxırdıq

Nənəmin gözləri biz onun içində olanda örtüldü

Biz nənəmin içində ağlaşa-ağlaşa qaldıq

İnsanın parça-parça öldüyünü heç kim

deməmişdi bizə

Bizə deməmişdilər ki,

Döşlərindən başlayır ölməyə

qadın bədəni

Deməmişdilər ki,

Ən axırda qadının ayaqları ölür

Biz gözümüzü açanda nənəmin döşləri

çoxdan ölmüşdü

Sinəsində basdırmışdı ölmüş döşlərini nənəm

Nənəm öləndə adamlar əllərinə tüpürüb, beli

götürdülər və dedilər:

- şükür sənə ilahi, çoxdan idi ki, yaxşı adam

basdırmırdıq.

Sən gələndə tək idim, insanlara

məktub yazıram

Yazırdım ki, ey insanlar,

sizinlə bir dünyada yaşamaq

Evinizin yanında ev tikmək, sizə qonşu olmaq

Heç bilirsiniz necə çətindir?

Sən gələndə sənə demək istəyirdim ki, darıxma

Küləklər səni çox sevdiyindən

Hamıdan çox üşüdəcək

Yağışlar səni hamıdan çox isladacaq

Dəniz səni çox sevdiyindən

Hamıdan tez boğacaq sularında

Balıqlar səni çox sevdiyindən

Hamının cəsədindən tez gəmirəcəklər cəsədini

Torpaqlar bütün sümüklərdən tez çürüdəcəklər

sənin sümüklərini

hər şey, hər şey səni

tələsdirəcək ki,

Mənə tez qovuşasan

Sən gələndə mən canlı deyildim, adam deyildim

Mən sənin gəlib çıxdığın yer idim!

Yeni il tənhalığı

Bakıya qar yağmadı, qarsız düşdü qış bizə.

Şaxta baba və qar qız, gəldilər yanlış bizə.

Dustaqlar buraxıldı… şeş düşdü tale zəri.

Qazamatda açıldı yeni dustaq yerləri.

Pəncərədən boylanıb baxdım,

…baxdım ölkəmə.

Xəyalımda dalbadal güllə çaxdım ölkəmə.

Korladı əhvalımı, millətin girincliyi.

Vətənin bol-bol nefti, işsiz, evsiz gəncliyi.

Sonra da üzüquylu zülüm-zülüm ağladım.

Gedənə rəhmət deyib, gələnə yas saxladım.

Xəyalımda canlandı dostlarımın taleyi.

Xalqın deyingənliyi, hökumətin gileyi.

Alt-üst olmuş ömürlər

…hər yan bomboz tənhalıq.

Bu da bayram süfrəsi; yarım araq, şor balıq.

Bir də yalqız kitablar, düzülüblər yan-yana.

Niyə hər şey düşməndir, hər şey, hər şey insana?

Ot basıb hər cığırı, yox daha ümid yolu.

Qəlbim yalqız və bomboş, külqabımsa dopdolu.

əsəblərim pozulmuş, yuxuda da qan-tərəm.

Getedən daha qoca, gənc Verterdən betərəm.

Qulliver də deyiləm, çıxıb səyahət edim.

Üç-dörd lilipud qalıb. Mən axı hara gedim?

Bəlkə, Bulqakov kimi məktub yazım padşaha.

Görən, bu hərəkətim xoş gedərmi Allaha.

Bəlkə, Tolstoy olum, atım gedim mülkümü.

Bəlkə, quruyum ot tək, bəlkə, solum gül kimi.

Ya da Çörçillsayağı qurşanım siqaretə.

Bir memuar da yazım. Lazım olar millətə.

Ya da ki Homer olum, bəlkə, gözüm tutula.

Bəlkə, gözüm görməyə, bəlkə, canım qurtula.

Hüqo da çox uzaqdı, başı qarışıb nəsrə.

Taksi də baha gedir on doqquzuncu əsrə.

Bu vaxt kim bekar olar, ağlıma kimsə batmır.

Svayq evdə olmaz, Selincerə zəng çatmır.

Qorki də çox qocadır, içkini də tərgidib.

Hadi də itkin düşüb, yer üzünü tərk edib.

Məmmədquluzadə də, deyirlər, can üstədir.

Fiscerald ayıq olmaz, Kafka da ki, xəstədir.

Bəlkə, Dostoyevski? O da yəqin kart sıxır.

Pamukla dalaşmışıq, məni Rollan Bart sıxır.

Balzakla da alınmaz, özündən çox razıdır,

onunku ya romandı, ya fransız qızıdır.

Bəlkə, Somerset Moem? Görən, indi hardadır?

Heminquey yüz faiz bahalı bir bardadır.

Puşkin də yaralıdır, yatır xəstəxanada.

Bədbəxt, bir arvad üçün özünü verdi bada.

Nazim Hikmət türmədə, Turgenev də Parisdə.

Tolstoyla dalaşıb ucuz bir ləçər üstə.

Bəlkə, bir viski alım, qonaq gedim Markesə.

O da bir şey bişirtsin arvadı Mersedesə.

Dünya necə qapanıb, buz bağlayıb qütblər.

Pelevin Tibetdədir, Limonovu tutublar.

Belə gündə Yesenin! Yeyən, içən arvadbaz.

O da özünü asdı bizim vaxtla keçən yaz.

Bəlkə, filosoflardan hansısa bekar olar.

Onlar da çox danışır: “Allah yoxdur, Allah var...”

Onlardan abırlıdır, çox yazsa da Şekspir.

Onun da başın pozub, Dezdemona, Kral Lir.

Bir az yaşlı olmasa, Hamsun hamıdan dincdir.

Kuper meşədən çıxmır, Çinkaçukla girincdir.

Adamın Ekoya da gəlmir fikri, gümanı.

Görməyə də gözüm yox, ata-oğul Dümanı.

Zəhləm gedir Sinklerdən, fırıldağın biridir.

Çoxdan ölüb zırrama, elə bilir diridir.

Harda qalım ilahi, hara gedim ilahi?

Özünü qoy yerimə, mən nə edim ilahi?

Bəndələrin yerdədir, sən göydə nə gəzirsən?

Gəl, bir insan ömrünü, yaşa görüm, dözürsən?!

Alt-üst olmuş ömürlər,

...hər yan bomboz tənhalıq.

Bu da bayram süfrəsi; yarım araq, şor balıq.

Oxşar xəbərlər

Xəbər lenti

Pənahəli xanın dağıdılmış imarəti
18:37 26 Noyabr 2020
Müvəqqəti komendantlıqlar üzrə iclas keçirildi
17:49 26 Noyabr 2020
Nə yaxşı görüşdük, nə yaxşı yenə - Ən gözəl Kəlbəcər şeirləri
17:01 26 Noyabr 2020
Döyüşçü oğlunu ağladan səbəb - Hekayə
16:17 26 Noyabr 2020
“Qarabağ”ın Qarabağ qələbəsi – Ulucay yazır...
15:34 26 Noyabr 2020
İstedadı ilə hamını heyrətləndirən, iki dəqiqəyə qızların sevimlisinə çevrilən, gənc yaşında “yüksək doza”dan ölən azərbaycanlı şair – Maraqlı faktlar
14:53 26 Noyabr 2020
"Can Azərbaycan" adlı müsabiqə elan olundu
14:10 26 Noyabr 2020
Qəriblik - Əli Şirindən şeir-esse
13:32 26 Noyabr 2020
Xalq artistindən sürpriz Şuşa açıqlaması
12:53 26 Noyabr 2020
Cavanşir Quliyev: "Bakıda lazım olduğuma əmin deyiləm" - Müsahibə
12:11 26 Noyabr 2020
Əməkdar artist vəfat etdi
11:39 26 Noyabr 2020
Aqşindən Seymur Baycana reaksiya: "Onu oxumuram"
11:09 26 Noyabr 2020
Xəlil Rza Ulutürkün bacısı dünyasını dəyişdi
10:17 26 Noyabr 2020
Maradonanın ən böyük peşmanlığı - Ayxan Ayvaz yazır...
10:00 26 Noyabr 2020
Bombardmandan Azərbaycan bayrağını çıxaran gəncəli Xəyyam: “Gördüm, qızımın başından qan axır”
09:00 26 Noyabr 2020
İşğaldan azad olunan 700 yaşlı abidəmiz
18:52 25 Noyabr 2020
“Can Qarabağ” deyən uşaqlar
18:10 25 Noyabr 2020
Erməniyə zorla ərə verilən qızın Xocalıdan qaçış planı - Yeni hekayə
17:29 25 Noyabr 2020
Azərbaycanlı yazarın pyesi Batumidə tamaşaya qoyulacaq
16:49 25 Noyabr 2020
Azərbaycanlı yazıçı dünyasını dəyişdi
16:04 25 Noyabr 2020