Kulis.az bu gün 90 yaşı tamam olan və bu münasibətlə ölkə başçısı tərəfindən “İstiqlal” ordeni ilə təltif edən Xalqa yazıçısı Nəriman Həsənzadə ilə müsahibəni təqdim edir.

- Nəriman müəllim, necəsiniz? Səhhətiniz necədir?

- Yaxşıyam, çox sağ olun! Özümü yaxşı hiss edirəm. Allah hamınızın canını sağ eləsin!

- Sizi 90 yaşınız və təltif olunmağınız münasibəti ilə təbrik edirik.

- Çox minnətdaram! Diqqətinizə görə təşəkkür edirəm.

- Ölkənin ən nüfuzlu ordeni olan “İstiqlal”la təltif olunmağınız əhvalınıza, səhhətinizə müsbət təsir edər...

- Heç şübhəsiz! Allah cənab prezidentimizin canını sağ eləsin! Məni həmişə yüksək qiymətləndirib. Tək məni yox, mədəniyyətimizdə xidməti olan heç kimi yaddan çıxarmır. Çox diqqətlidir. Minnətdaram ona da!

- Təltifiniz və 90 yaşınız Qarabağ qələbəsindən sonraya təsadüf etdi. 90 yaşa çatmaq, böyük qələbənin şahidi olmaq, “İstiqlal” ordeni almaq hər adama qismət olmur. Necə hissdir?

- Çox düz deyirsiniz. Allaha min şükür ki, mənə bu günləri göstərdi. Qələbə sevinci yaşadım. Bu böyük qələbə münasibətilə çoxlu şeirlər yazdım. Cəbhədən əsgərlərimiz oxuyub mənə teleqram göndərirdilər. Həmin teleqramlar “Azərbaycan” qəzetində çap olunub. Mən də onlara şeirlər ithaf eləyirdim. Bir poema da yazdım. İndi o poema ilə bağlı Dövlət Televiziyası ilə Gənc Tamaşaçılar Teatrı birgə layihə hazırlayır. Əsərin adı belədir: “Qarabağ Azərbaycandır, Qarabağnaməm İlhamdır!” Poema tamaşa kimi hazırlanır. Rejissoru İdris Ağalaroğludur. Yəqin bugünlərdə nümayiş olunar. Sizi də dəvət edirəm.

- “Qarabağ Azərbaycandır, Qarabağnaməm İlhamdır!” poemanın epiqrafıdır, yoxsa adıdır?

- Adıdır. Cənab prezident, Ali baş komandan “Qarabağ Azərbaycandır!” söylədi və dediyini həyata keçirdi. Mən də bu ifadəyə əlavə olaraq yazdım ki, “Qarabağnaməm İlhamdır”. Qarabağla bağlı ən möhtəşəm tarixi o yazdı.

- Həmişə təntənəli yubileyləriniz keçirilib. İndi obyektiv səbəblərdən geniş tədbirlər keçirə bilmirik, bu, sizə təsir eləmir ki?

- Xeyr. Virus bəlasından qorunmaq üçün bunları etməyə məcburuq. Mən də hamı kimi. Təki bu sıxıntılar həyatımızdan çıxıb getsin.

- 90 yaşınızı ev şəraitində də qeyd etmirsiniz?

- Yox. Qeyd etmirəm. Allah qoysa, havalar düzələr, bu zəhrimar virus rədd olub gedər, ondan sonra qeyd edərəm. Dostlarıma deyirəm, gəlməyin, yığılmayaq. Çoxdur gəlmək istəyən, hamısını sonraya saxlamışam. İnanın, dünəndən zənglər, təbriklər dayanmaq bilmir. Telefonu yerə qoyuram, yenə zəng gəlir. O vəziyyətdəyəm. Budəfəki yubileyimi də belə qeyd edirəm. Bunun özü də böyük sevincdir elə. Çox razıyam. Dostlarımdan da, oxucularımdan da.

- Pandemiya sıxıntıları ilə birlikdə həm də yazıçılar üçün yazmaq fürsəti oldu. Siz nələr yazdınız?

- Elədi. Mən çoxlu şeirlər yazdım. “Azərbaycan”, “Respublika”, “Ədəbiyyat qəzeti”ində çap olundu. Poemam, sağ olsun Bəxtiyar müəllim (Bəxtiyar Sadıqzadə - red.), “Azərbaycan” qəzetində dərc etdirdi. Elə onun əsasında indi pyes hazırlanır.

- Nəriman müəllim, sizi bir daha təbrik edirik. İnşallah Şuşada yubiley şöləninizdə görüşərik...

- Amin! Amin! Amin!

• "Qəlblərin harmoniyası–6” festivalı gənc istedadları bir araya gətirəcək
• İTV-nin baş direktoru vəzifəsinə sənəd qəbulu elan ediləcək
• Brem Stokerin "Drakula"sının tarixi prototipi kim idi?