news-inner
clock11:05 calendar-gray 30 Noyabr 2020 view-gray986 dəfə oxunub
view-gray986 dəfə oxunub

Yadındadı, içib qızlardan danışmağın? - Şuşada döyüşən zabit dostuma məktub

Kulis.az gənc yazar Ulucay Akifin Şuşa döyüşlərində baş leytenant kimi iştirak edən tanınmış şair Emin Piriyə yazdığı məktubu təqdim edir.

Salam, Emin!

Necəsən?

Dünən bizə Şuşadan əlisilahlı şəklini yolladın, hamımız fərəhləndik. Hətta şəklini qarşıma çıxan hər kəsə göstərib “Bu, mənim şair dostumdur! Onunla o qədər pivə içib şeirdən, qadınlardan danışmışıq ki…” demək istəyirdim.

Əsgər yoldaşlarının çəkdiyi videoya da baxdıq. Dedin ki, biz gənclər bu vaxta kimi ancaq işğal görmüşdük, indi ilk dəfə qələbə görürük. Əsgər səni komandir və baş leytenant kimi təqdim edəndə lap qürur duydum.

Sən demə, şairlər də komandir ola bilərmiş!

Fikir verdim, saqqalın ağarıb. 44 günlük savaşın içində elə yaşlanmısan, elə bil 44 yaşın var. Amma şəkildə gözlərinin içi parıldayır, xoşbəxt görünürsən. Bilirəm ki, çox xoşbəxtsən. Çünki sən müharibə haqqında ən gözəl şeirləri yazmış şairlərdən birisən. Özün də bilirsən ki, elə səni bir şair kimi ən çox həmin o şeirlərə görə sevirik, “18+” şeirlərinə görə yox.

Ay Emin, hazır sən məndən yüzlərlə kilometr uzaqda ikən sənə bəzi şeyləri etiraf edim. Hər dəfə görüşəndə elədiyin qız-qadın söhbətlərindən bezmişdim. Çox vaxt da ona görə vacib işimin olduğunu deyib sənlə görüşdən qaçırdım. Nə qədər olar axı, filan qız məndən ötrü ölür, filankəs məndən əl çəkmir, o birisiylə keçən gün görüşdük… Hamısının gop olduğunu bilirdim. Məcbur qulaq asıb özümü inanmış kimi göstərirdim.

Elə danışırdın, elə bil, Azərbaycan Yazıçılar Birliyinə üzv olan gənc xanımların çoxu səndən ötrü ölür. Elə danışırdın, elə bil, Gənc Ədiblər Məktəbinin banisi sənsən. Bizi boş ver, az qalsın Rəşad Məcidin də haqqına girirdin.

Hamısının yalan olduğunu bilirdim, amma üz vurmurdum. Hətta sənin dərdindən öldüyün dediyin o qızların bir çoxu mənə sənin əlindən bezdiklərini deyirdilər.

Söhbət eləmək üçün görüşə çağırırdın, imkan vermirdin, mən də ağzımı açıb iki kəlmə söz deyim. Heç fasilə vermədən, hər mövzuda danışırdın.
Bilmirəm necə olurdu, söhbətə Markeslə başlayıb Usama bin Ladenə keçid eləyirdin. Ya da hansısa qızdan danışıb qəfil Qulu Ağsəsə, “Ulduz” jurnalına istiqamətlənirdin.

Hələ bu qədər söhbət eləyə-eləyə necə olurdu, mən bir bakal pivəmi içib qurtarmamış, sən beşinci, altıncı bakala keçirdin?

Yaxşı ki, özün də bunun fərqinə varmışdın, görüşə çağıranda deyirdin ki, gəl, vallah bu dəfə az danışacam, imkan verəcəm sən də danışasan, amma yenə də imkan vermirdin.

Emin, yadına düşür, sənlə təzə dostlaşdığımız vaxt idi, şəhərin mərkəzindəki “Pub”lardan birinə getmişdik. Çox içmişdin. Bir ara siqaretin qurtardı. Utana-utana mənə dedin ki, olar sənə pul verim, gedib siqaret alasan? Elə bildin, təzə tanışıq deyə, məni buyurmağın xətrimə dəyər. Tez “ya da sən otur, özüm gedəcəm” deyib ayağa qalxdın və içkili olduğun üçün özünü saxlaya bilməyib stula yıxıldın, xeyli gülüşdük.

Həmişə hesabı sən ödəyirdin. Mənə deyirdin, sən tələbəsən, işləyəndə verərsən.

Mən işləməyə başlayanda da hesabı həmişə sən verirdin.

Xoşuma gəlməyən cəhətlərin olsa da, sənin xətrini həmişə çox istəmişəm.

Bunun ən birinci səbəbi sənin istedadlı şair olmağın idi. Çünki istedadlı adamların pis biri olacağını heç vaxt düşünməmişəm.
İkinci səbəb müəllim olmağın idi. Tarix müəllimisən və şanlı tariximizin yazılmasında iştirak etdin.
Üçüncü səbəb, keçmiş hərbiçi olmağındı. Bunu həmişə fəxrlə deyirdin və bir hərbiçi kimi də müharibədə iştirak etdin, Şuşaya əlisilahlı girdin.
Sənin şəklini görəndə bir az da paxıllığım tutdu. Atam Akif Səmədin bir şeirində belə yer var:

Bu şeiri Şuşaya
Bayraq sancan tamamlar

Atamın o şeirini tamamlamaq sənə qismət oldu, Emin!

Təbrik edirəm səni, Cənab Leytenant!

Salamat qayıt gəl, oturub yaxşıca içək. Bu dəfə hesab mənlik olacaq. Söz verirəm, indən belə nə danışsan inanacam və heç vaxt bezməyəcəm.
Bir də ki… Ta evlənməyin vaxtı çatıb. Şuşanı işğaldan azad elədin. İndi qızlar doğrudan da səndən ötrü öləcək. Birini seçib evlənərsən.

Bizim də canımız dincələr, sənin də, qızların da!

news-inner-user
Ulucay Akif

26 məqalə

Oxşar xəbərlər

Xəbər lenti

Oğlunun ölümünü ondan 40 gün gizlədilər – Xalq artisti haqqında maraqlı faktlar
21:13 21 Yanvar 2021
Xalq şairinin oğlu: “Atamın xəstəliyini hamıdan gizlətdim” - Müsahibə
20:00 21 Yanvar 2021
Tarix Muzeyinə direktor təyin edildi
18:59 21 Yanvar 2021
"Netflix"in abunəçilərinin sayı rekord həddə çatdı
18:15 21 Yanvar 2021
Filipp Kirkorov bu ölkəni məhkəməyə verir
17:39 21 Yanvar 2021
Bizdən istifadə edən qəddar sənətkarlar – Mehman Qaraxanoğlu yazır...
17:19 21 Yanvar 2021
"Bu nə deməkdir?" - Qismət nazirliyin keçirdiyi müsabiqəni tənqid etdi
16:38 21 Yanvar 2021
Makgregor Porye qarşıdurmasına 1xBet-dən "Risk etmədən mərc"
16:23 21 Yanvar 2021
Tanınmış müğənni şəhid baş leytenanta mahnı həsr etdi - Video
15:40 21 Yanvar 2021
Sən istə, sənin üçün batım hər günaha mən – Orxan Bahadırsoydan yeni şeirlər
15:01 21 Yanvar 2021
"Min bir gecə" Mariinski Teatrında anşlaqla nümayiş olundu - Foto
14:20 21 Yanvar 2021
Ədəbiyyat müsabiqəsinin qalibləri bəlli oldu
13:41 21 Yanvar 2021
Əsgər payına göz dikənlər
13:17 21 Yanvar 2021
Moskvada teatr və kinoteatrlar açılır
12:43 21 Yanvar 2021
O doğulmamış atası Sibirə sürgün edildi, ömrünü mənfi rollara həsr etdi, “baş yaramaz” adını qazandı – Kinomuzun “Göygöz kosa”sı
12:07 21 Yanvar 2021
Qar yağır - Günün şeiri
11:34 21 Yanvar 2021
21-ci əsrin 21-ci ilinin 21-ci günü – Bu gün nə baş verəcək?
11:03 21 Yanvar 2021
Tünzalə Ağayeva Şuşa haqqında klip çəkdirdi - Foto
10:34 21 Yanvar 2021
Azərbaycanlı rəssamın ABŞ-dakı sərgisi beynəlxalq mətbuatda
10:14 21 Yanvar 2021
Vətəni söyməyə nə var? - Aqşin Yenisey qürbətdə aşağılanmaqdan yazır...
08:58 21 Yanvar 2021