Rəşad Məcidin 40 yaşlı Şuşa şeiri

Rəşad Məcidin 40 yaşlı Şuşa şeiri – Mətn

11 noyabr 2020

11:02

Kulis.az tanınmış yazıçı-publisist, AYB katibi Rəşad Məcidin 1981-ci ildə Şuşada yazdığı şeiri təqdim edir.

Dərədə möcüzə, dağda möcüzə
Torpağa bu qədər vurulmamışdım
Gözəllik önündə heç vaxt, heç vədə
Belə təzələnib durulmamışdım

Dili tutulubmu torpağın, daşın
Görən niyə belə səssizdir bu yer
Haçansa Üzeyir ayağı dəyib
Yəqin ona görə əzizdi bu yer

Sükuta bürünüb Cıdır düzümüz
Bülbülün səsinə dalandan bəri
Torpaq dərd əlindən qayalaşıbdı
Ellər Natəvansız qalandan bəri

Göz dikib bu yerə yağılar yadlar
Su olub düzündə axa bilməyib
Nə qədər zirvələr fəth edib Qacar
Amma bu zirvəyə qalxa bilməyib

Burda daşları da qoruyaq gəlin
Hansı bir daşdasa Vaqif qanı var
Bura yaddaşıdır obanın, elin
Burda hər bir nəslin öz ünvanı var

Deyirəm, dünyada sevgi tapılmaz
Övladın torpağa sevgisi kimi
Bu yurd yaddaşımda qalacaq mənim
Tarixin möcüzə sərgisi kimi

Kulis.az

3629 dəfə oxunub

Paylaş