news-inner
clock12:20 calendar-gray 20 Oktyabr 2020 view-gray1415 dəfə oxunub
view-gray1415 dəfə oxunub

“Qəbiristanlığa qaçacam, atama salam verməyə...” – Kəndləri alınan yazıçılar ora necə qayıdacaqlar? - Sorğu

Kulis.az doğulduğu torpaqlar işğaldan azad olunan yazıçılardan doğma yerlərə qayıdış ssenarini soruşdu. İlk nə edəcəklər? Cavabları təqdim edirik.

Seyran Səxavət

Köndələn çayının qırağında məhəllə yerim var, daş-zad da tökmüşəm. Qayıdan kimi orda ev tikdirəcəm. Amma necə gedəcəyimi indidən deyə bilmərəm. Bəlkə hay-küylə, bəlkə səssiz. Əsas odur gedək. Necə getməyin o qədər də fərqi yoxdur.

Elçin Hüseynbəyli

Gözləyirəm yollar açılsın, Cəbrayıla gedim. İlk olaraq kəndimizi qarış-qarış, doyunca gəzmək istəyirəm. Kəndə qayıdış duyğusal olacaq. Hamımız kövrələcəyik. Nəinki Cəbrayıla, ümumiyyətlə, işğaldan azad edilmiş bütün torpaqlarımızı gedib gəzəcəm. Kəndimizə - Mahmudluya gedəndə silsilə yazılar yazmaq istəyirəm. Onsuz da mən oralara xəyalən gedib gəlmişəm. Qəti əminəm ki, Cəbrayılda yaşayacam. Bakıya da gələcəm, amma daha çox vaxtımı kəndimizdə keçirəcəm.

Süleyman Qaradağlı

Mənim ilk gedəcəyim yer “Araz” qəzetinin redaksiyası olacaq. Çünki yaradıcılığa ordan başlamışam. Sonra həyətimizdəki tut ağacıyla görüşərəm. Onun altında çox oynamışam. Uşaqlığım, gəncliyim keçən hər yeri – çayları, bulaqları, çəmənləri gəzərdim. Sonra bir-bir kəndin bütün evlərinə baş çəkərdim.

Mübariz Örən

Məncə, hissiyyat dərki üstələyəcək. Bütün ssenarilər alt-üst olacaq. Havalı, sevdalı qayıdacam oralara. Dəli kimi ora-bura vuracam özümü, qollarımı açıb səbəbsiz dörd tərəfə qaçacam... Bəlkə də elə olmayacaq. Heç vaxt olmadığım kimi sakit və kədərli olacam. Doğma dərələrin, yalların, səsini, nəfəsini dinləyəcəm, - ana laylası, nənə nağılı kimi... Qoxusunu acgözlüklə sinəmə çəkəcəm, - azadlıq havası kimi. Uzun-uzun yollarına baxacam, uzun-uzun. Daşına, ağacına, otuna mehribanlıqla salam verəcəm. Gözü tutulmayıbsa, ovuclayıb kəhrizlərin suyunu boynuma, sinəmə dağıdacam... İnsanların üstünə atacam, şitənəcəm, uşaqlaşacam. Sonra ayaqyalın qəbiristana sarı qaçacam, atama salam verməyə...

Ramilə Qurbanlı

Əvvəlcə dizlərimi yerə atıb o torpaq uğrunda şəhid gedənlərin ruhuna dua oxuyacam, sonra o yurdun həsrətilə rəhmətə gedənlərin... Ayağa qalxmamış artıq müqəddəsləşmiş torpağımızı qucaqlayıb öpəcəm. Əsas yoldan kəndimizə ayrılan yolun ağına pay-piyada düşüb hər qarışının zövqünü yaşayaraq gəzəcəm. Döngəsinin, dalanının, hər küncünün, yovşanının, yemliyinin, çayırının, bulaqlarının, qaramalarının həsrətini çox çəkmişəm, zövqü-səfasını yaşayacam. Ağzımın da dadı qaçmışdı oralarsız, o dadı qaytarmaq üçün yabanılaşmış pencərindən dadacam. Bulaqlarının suyundan içəcəm, Arazdan nəm çəkən havasını ciyərlərimə çəkəcəm. Əslində, babalarımın məzarını ziyarət edəcəm demək də istəyirəm, amma vandallar məzarlığımızı şumlayıblar.

Xalid Kazımlı

Maşına minib, gedib, xarabamıza baxacam. Çalışacağam, kövrəlməyim. Kövrələnlərə də təpinəcəm.

Xəyyam Rəfili

Ən birinci Cəbrayıldan üzr istəyəcəm. Deyəcəm, bağışla bizi, səni qoruya bilmədik, amma unutmadıq, bax, geri gəldik. Sonra çinar kəhrizindən doyunca içəcəm. Daşlarına əlimi sürtəcəm - ovuc içi kimi sığallı çaylaq daşları var, bir də tinləri bıçaq kimi iti çapaq daşları. Sonra tanıdığım ağacları axtaracam. Cəmil Əhmədovun heykəlindən yüz metr yuxarıda - çinar ağacının başında özümə məftillərdən yuva düzəltmişdim. Nənəmgilin həyətindən ciblərimi ərik sarfasıyla doldurub, çıxıb oturardım o yuvada. Həyətimizdə gövdəsinə bıçaq batırdığım şam ağacını bağrıma basacam. Məmmədbəy kəhrizinin üstündəki çinarın altından sarı torpağın qoxusunu ciyərlərimə çəkəcəm və xoşbəxt olacam.

Samirə Əşrəf

Bu barədə danışmaq mənim üçün hələ də çətindir. Baxmayaraq ki, mənəvi baxımdan indi çox rahatam. İçimdə çoxdan gözlədiyim bir dinclik yaranıb. Rayona getsəm, ilk görəcəyim işi hələ müəyyənləşdirməmişəm. Amma torpağın, uşaqlıqda yaşadığım yerlərin enerjisini hiss etmək istəyirəm. Bu dəqiqə ən çox istədiyim şey məhz o yerlərin, keçmişin, torpağın enerjisini duya bilməkdir.

news-inner-user

18716 məqalə

Oxşar xəbərlər

Xəbər lenti

“Azərbaycan–ispan danışıq kitabçası” çap olunub
18:18 12 May 2021
Azərbaycan bəstəkarlarının əsərlərinin toplusu Şuşada təqdim olundu - Foto
17:41 12 May 2021
"Xarıbülbül" musiqi festivalı başlandı
15:00 12 May 2021
Mənim Tanrım gözəllikdir, sevgidir - Hüseyn Cavidin şeirləri
14:24 12 May 2021
Ağadadaş Ağayev əməliyyat öncəsi fotosunu yaydı
13:09 12 May 2021
30 ilin ən gözəl müjdəsi
12:04 12 May 2021
Tanınmış aktyor vəfat etdi
12:00 12 May 2021
Bu gün Şuşada «Xarıbülbül» müsiqi festivalı başlayır
10:12 12 May 2021
İrəvandan yük maşınında qaçan, özündən 24 yaş böyük direktorla evlənən, İran şahının sevimlisi olan Xalq artisti
09:03 12 May 2021
Sonsuz - Şərif Ağayarın hekayəsi
17:00 11 May 2021
Filmimiz Braziliyada beynəlxalq festivalda sertifikata layiq görülüb
15:50 11 May 2021
Soljenitsının Nobel almasının gizlinləri
14:45 11 May 2021
İntəhasız acı nəğmə - Qorki haqqında esse
13:25 11 May 2021
Sevgiliyə gül uzadan əllərin tənhalığı - Ramil Əhməddən yeni şeirlər
12:00 11 May 2021
Tom Kruz mükafatlarından imtina etdi - Qalmaqal
11:30 11 May 2021
“Qarabağa sülh, sevgi və ümid” adlı xeyriyyə konserti keçiriləcək
10:26 11 May 2021
II Nikolayın qızı onun şəklini istədi, çar öz sarayına qonaqlığa çağırdı - Azərbaycanlı qaçağın film kimi həyatı
09:00 11 May 2021
Berlin Film Festivalı açıq havada keçiriləcək
17:35 10 May 2021
Musa Dədə əbədiyyət yaşında
15:51 10 May 2021
Çingiz Qənizadə: “Kəramət Böyükçölü maliyyələşdirib üstümə göndərənləri yaxşı tanıyıram” – Müsahibə
14:30 10 May 2021