Dünya heç vaxt məzlumun yanında olmayıb. Açın, tarixi vərəqləyin.

Dünya heç yerdə ədaləti bərpa etməyib. Sən öz ədalətinin arxasınca özün getməsən, heç kim bunu etməyəcək. Heç bir ölkənin müqəddəratını başqaları həll etmir.

Biz güclü olmalıyıq. Çünki dünya zəifin yox, güclünün yanındadır. Elə olmasaydı, Xocalıya görə çoxdan erməniləri o torpaqlardan çıxarardı. Demək, onların vecinə deyil.

Gəncədə baş verənlər də heç kəsin vecinə olmayacaq. Nə qədər səsimizi ucaltsaq da, xeyri yoxdur.

Bizim özümüzdən başqa heç kimimiz yoxdur.

İstər inanın, istər inanmayın, dediyim həqiqətdir. Əgər bir balaca araşdırma aparsanız, görərsiniz ki, dünya heç vaxt məzlumun yanında olmayıb.

Afrikada olanlara dünya göz yummadımı?

Çində uyğurlara olan hücumlara dünya susmadımı?

O boyda Xocalını görüb, yenə də işğalçını dəstəkləyən ölkələr olmadımı?

Mən anlayıram, Gəncədə baş verənləri dünya görməlidir, bunun üçün müxtəlif dillərdə paylaşımlar etmək vacibdir.

Amma və lakin, dünya gözünü yumubsa, nə etməli?

Onlar həqiqəti bilə-bilə susurlarsa, biz də sakitcə onların qərarını gözləməliyik?

Həmişə haqdan-ədalətdən, sülhdən, insan sevgisindən bəhs edən dünya üçün əmin olun ki, bütün bunların heç bir əhəmiyyəti yoxdur.

Xəritəni qabağınıza qoyun və düşünün, dünyada sözü keçən ölkələr qabaqcıldır və onların dediyi həqiqətdir.

Onlardan kənar hər şey boş və mənasızdır.

Məzlum və zəif dünyaya sadəcə ədəbiyyatda, kinoda lazımdır.

Dünya güclünün yanındadır.

Dünya güclünü sevir.

Onlar zəifləri sadəcə öz güclərini göstərmək üçün sevərlər.

Ona görə də dünyadan, başqa böyük dövlətlərdən nəsə gözləməyə dəyməz.

Onlar onsuz da hər şeyi yaxşı başa düşürlər.

Biz bu savaşda təkik.

Tarixən tək olmuşuq.

İndi də elədir.

Dünyadan qayğı gözləmək yerinə müqəddaratımızı özümüz təyin etməliyik.

Bizim bu dəqiqə özümüzdən başqa kiməsə güvənimiz olmamalıdır.

Artıq vaxtı yetişib.

Ya özümüz qabağa düşüb bu bəlalardan xilas olacağıq, ya da dünyadan kömək uma-uma gözümüzdə həsrət gözləyə-gözləyə qalacağıq.

Bircə yol var: dünyaya güclü olduğumuzu göstərmək!

Vəssalam.

Ondan sonra qapanmış gözlər açılacaq.

Və görəcək ki, biz haqlıymışıq.

• Migel de Unamuno və Herbert Uellsin gizli qalan məktubu tapıldı
• Bakıda “İsveçrə və Azərbaycan musiqisi dialoqda” adlı tədbir keçirildi
• "Nənələr" folklor qrupu üzvünün Ukraynada müharibədə öldürülən oğlu Lənkəranda dəfn edildi