Rus kitab evində tanınmış Azərbaycan yazıçısı Natiq Rəsulzadənin “Seçilmiş əsərləri” kitabının təqdimatı olub. Tədbirin təşkilatçıları Rusiya Federasiyasının Azərbaycandakı səfirliyinin dəstəyi ilə “Avrasiya Tədqiqatları İnstitutu” İnkişaf Fondunun Azərbaycan filialıvə “Novosti-Azərbaycan” informasiya agentliyidir. Bakıda, Moskvada və Avropa ölkələrində nəşr olunmuş 40-dan çox kitabın müəllifi, Teatr Xadimləri İttifaqı idarə heyətinin üzvü, Azərbaycan Kinematoqrafçılar İttifaqının, Yazıçılar İttifaqının üzvü, bədii film ssenarilərinin və pyeslərin müəllifi, bir neçə ədəbi mükafatın, iki “Humay” mükafatının laureatı, əməkdar incəsənət xadimi, “Şöhrət” ordenli Natiq Rəsulzadə həm öz vətənində, həm də xaricdə tanınıb.

Müəlliflə görüş həmişə maraqlı olur, xüsusən də rus dilində yazan müasir Azərbaycan yazıçısı Natiq Rəsulzadə ilə. Onun kitablarında yazıçının öz qəhrəmanlarına xüsusi məhəbbəti duyulur. “Seçilmiş əsərlər” kitabına müəllifin 19 hekayəsi və beş povesti daxil edilib. Onların hər biri, hətta ən kiçik hekayə də yaddaqalandır. Buna görə də müəllif üçün “kiçik” qəhrəman yoxdur, onların hər birinin arxasında insan durur! Müəllif “Xilas et və bağışla” hekayəsində deyir: “Allah insanı yaradır, insanı, peşəni yox, bütün işlər və sənətlər isə sonradan yaranır, çox şey şeytan əməlidir, amma insanı yaradan Allahdır...”

Rusiya Federasiyasının Azərbaycandakı səfiri Vladimir Doroxin qeyd edib ki, öz zəngin və qədim ədəbiyyatı ilə şöhrət qazanmış Azərbaycanda bütövlükdə rus dilli ədəbiyyatın bir hissəsini təşkil edən rus ədəbiyyatı da var. Burada rus dilində yazan yazıçılar da nüfuz sahibidirlər.

Təqdimatda “Avrasiya Tədqiqatları İnstitutunun” Azərbaycan filialının direktoru Rauf Həsənov, Milli Məclisin deputatı, Azərbaycan Xarici Dillər Universitetinin rektoru Səməd Seyidov, Azərbaycan Arxitektorlar İttifaqının sədri Elbay Qasımzadə, Dövlət film fondunun sədri, əməkdar incəsənət xadimi Cəmil Quliyev, Xalq Rəssamı Arif Hüseynov N.Rəsulzadəyə yaradıcılıq uğurları arzulayıblar.

Natiq Rəsulzadə tədbirin təşkilatçılarına və iştirakçılarına minnətdarlığını bildirib.

• Teatral işıqda İsanın cansız bədəni – Karavacconun “Məsihin dəfni” tablosu
• Qızının faciəsindən sonra danışa bilmədi – Nuriyyə Əhmədovanın həyatını dəyişən gün
• Bir mühacirin kitabı sovet Bakısına necə sızdı? - Cavidin Vaşinqtondakı barelyefinin arxasındakı şuşalı