Dekabrın 8-də Kitab Klubunun sərgi salonunda Rövşən Yerfinin “Üzdəniraq ada” kitabının təqdimat mərasimi keçirilib. Lent.az-ın məlumatına görə, tədbirdə Kitab Klubunun rəhbəri Elxan Rzayev hələ R.Yerfinin penitensiar xidmətdə işlədiyi müddətdə bədii yaradıcılıqla məşğul olduğunu deyib.

O bildirib ki, yazar həbsxana sahəsi üzrə mütəxəssis olduğundan, onun görüb-yazdıqları eşidib yazanların əsərlərindən daha dəyərlidir: “Rövşən Yerfi həyata yüngül yanaşan adamlara üzdəniraq adaları təsvir etməklə bir dərs verir. Bu kitab görməyib bilməyənlər üçündür. Heç kim oranı görmək istəmir. Amma oranı bilmək lazımdır. Çünki oranı biləndən sonra buranın qədrini bilirsən. Bu mənada, Rövşən bəyin əsərləri çox güclü tərbiyəvi əhəmiyyətə malikdir”.

Onun fikrincə, yaxşı təqdimat və reklam olacağı halda, R.Yerfinin kitabları çox oxunacaq: “Bu kitab əvvəlki kitablardan qazandığının hesabına dərc olunub. O, öz qazancı ilə kitab çıxaran 10 yazardan biridir. Bu, hər yazıçıya qismət olmur. Çox vaxt kitablar ya sponsorun vəsaiti, ya başqa bir yerdə işinin hesabına işıq üzü görür”.

Kitabla bağlı müəyyən iradlar da səsləndirilib. Qeyd edilib ki, həbsxana mövzusunu məşhur detektiv yazar Aqata Kristinin əsərləri səviyyəsində də işləmək olardı. Yazar isə məhz penitensiar xidmətdə çalışdığı üçün belə mövzuları dərindən yaza bilmədiyini etiraf edib: “Artıq azad insanam. Bundan sonra belə mövzulara istədiyim mövqedən yanaşacağam. Mən tənqidə açıq insanam. Bütün irad və təkliflərinizi gələcəkdə nəzərə alacağam”.

Müəllif bildirib ki, Kulis.az saytında “Qanunda olmayan dövlət” başlığı ilə silsilə yazılarının oxunma sayının xeyli çox olduğunu gördükdən sonra bu kitab üzərində işləyib, onun daha çox yayılmasına çalışmağı qərara alıb.

Digər çıxış edənlər kitabı bir sənədli əsər kimi də əhəmiyyətini vurğulayıblar. Yazar Tofiq Nurəli R.Yerfinin əsərlərində mühüm xüsusiyyət kimi içəridən çöldəki həyatın əslində faciələrlə dolu olduğunu qeyd edib: “Bu baxımdan onun əsərlərində yanaşma tərzi fərqlidir. Mən belə yanaşmaya indiyədək oxuduğum kitablarda rast gəlməmişəm. Bu materiallar içərisində böyük dramatizm var. Bu əsərlər üzərində işləsə, gərgin süjetli pyeslərə çevirmək olar. Güman edirəm ki, o dram əsərləri daha çox rezonans doğuracaq. Çünki dramaturgiyada belə hal yoxdur”.

“Üzdəniraq ada” şəhərin içərisində “təkcə fiziki baxımdan yox, mənəvi üzdəniraqlarla dopdolu dünya, mücərrəd yad ada”dan bəhs edir. Əsərin mövzusuna gəldikdə, cəzaçəkmə müəssisəsinə işləməyə göndərilmiş gənc zabit Şəfi ilə birgə hündür hasarlar, qəfəslər arxasındakı həyatın yeknəsəq, cansıxıcı anlarını yaşayır. İstəməyərəkdən cinayətlər törədən, qatilə çevrilən insanların hekayətləri ilə, məhkumlar arasındakı təbəqələşmə ilə tanış olur. Əzizlə Zinyətin nakam sevgisinə acıyır, haqqın qara qüvvələr tərəfindən təzyiqlərlə üzləşməsinin bir daha şahidinə çevrilir. Əsər ədəbiyyatımızda detektiv janrının əsasını yaradan yazıçı Cəmşid Əmirovun oğlu, ədliyyə polkovniki Çingiz Əmirovun xatirəsinə həsr olunub.

Qeyd edək ki, yeniyetmə çağlarından yaradıcılıqla məşğul olan Rövşən Yerfi 1987-ci ildə yazdığı “May çiçəyi” hekayəsi ilə fəal ədəbi fəaliyyətə başlayıb. Mətbuatda ilk hekayəsi 1989-cu ildə dərc olunub. Həmin il “Debüt-89” respublika ədəbi yaradıcılıq müsabiqəsinin nəsr üzrə qalibi olub. 2004-cü ildən başlayaraq, dörd kitabı işıq üzü görüb. 1993-cü ildən Jurnalistlər Birliyinə üzv qəbul edilib. 1991 – 1995-ci illərdə Səhiyyə Nazirliyinin orqanı olan “Şəfqət” qəzetində (indiki “Tibb” qəzeti) ilk məsul katib işləyib. O, 1995 – 2012-ci illərdə Penitensiar Xidmətdə işləyib. R.Yerfi bu xidmətdə çalışmış ilk yazıçıdır.

• Onun nə vaxt uydurduğunu, nə vaxt gerçəyi söylədiyini anlamaq olmur... - Sual soruşmağı kim yasaqlaya bilər ki?
• “Park” nəşriyyatından növbəti kitab: “Kinderland”
• “Qış nağılı” II Beynəlxalq Musiqi Festivalı başlayır