Bu gün çağdaş poeziyamızda özünəməxsus yolu olan Aqşin Evrənin doğum günüdür. Şair bu gün 30 yaşını qeyd edir. Kulis.az Aqşin Evrəni təbrik edir və oxuculara onun yeni şeirlərini təqdim edirik.

Taleyin burulğanı

Qəribədir:
Gəmilər insanları sahilə çıxarmaqçün yaradılır
Amma yalnız batan gəmilər tarixdə qalır.

Zəlzələ

Dağıntılar altında son dəfə gözünü açır şəhid atası
Və görür - üstünə oğlunun şəkli vurulmuş divar aşıb.

Şah Təhmasibə məktub

Nizələrin ucuna ilişən kəfən parçası
Sülh bayrağıtək yüksələr başımızın üstündə:
Bax, ölüm aləti belə bizi sülhə çağırır,
Ölüm sülhü bağırır, Şah!

Qəfil qılınclar doğrayar atların küt səsini,
Qapılar hər gün darıxar, gözləyər it səsini.
Birdən qəbirlər doldurar boş torpaq kisəsini
Əlini dünyadan çəkib evinə gedər Allah.

Şah!

İnsan torpaqçün döyüşər. Atlar nalından yıxılar
Ölmüş atın ayağından bizə baxar aypara
– Yəni göylər yerə enər... göylər gələr döyüşə
Görən necə olar bir gün torpaq ayağa qalxıb
insanların uğrunda gecə-gündüz döyüşsə?

Mən də torpaq istədim bir uşağın dibçəyinə tökməyə...
Sonra qılınclar doğradı atların küt səsini,
Qapılar hər gün darıxdı, gözlədi it səsini.
Biz də məşəl yandırdıq önümüzü görməkçün
Əksinə, tüstü qalxıb tutdu gözlərimizi.

Nal soyuğu gecədə bir sualım var sənə,
böyük Şah həzrətləri:

Buğdanın ortasındakı xətt
çörəyi yarı bölməli olduğumuza işarə deyilmi?

İşıqların qayıdışı

Bulud fikirləş - yağış yağsın düşüncələrinə
İslansın xəyalındakı qızının gülləri
Ananın dua üçün açılan əlləri
İslansın şəhər;
xanımını qucağında keçirt gölməçədən
Birlikdə damlaları tutun:
Bir gölməçə də siz oğurlayın küçədən.

Evdəykən tavanını, çöldəykən çətirini döyən yağış
sənə qovuşmaq istəyir bəlkə?
Yağış yağır
qlobusun üstündə axır damlalar
- islanır quraqlıq bir ölkə.

Ümid fikirləş... qoy ömrünə səadət dolsun.
Bulud fikirləş... və arxasında bir Günəş olsun.

• Kərpickəsən kişinin son dastanı - Şərif Ağayarın yeni hekayəsi
• Media və Yayım Şurası yaradılır
• Məşhur aktyora şok etiraz: Qadınlar onu kafedən qovdular