“YARAT” Müasir İncəsənət Mərkəzində açılmış tanınmış rəssamı Fərid Rəsulovun “Qurban olum” sərgisi ilə hər kəsin tanış olmaq imkanı olacaq.

Sərgi həftənin II, III, IV və V günləri, saat 12:00-dan 20:00-dək ziyarətçilərin ixtiyarına veriləcək. Binaya eyni vaxtda 6 nəfər daxil ola bilər. Tibbi maskaların və antiseptikin istifadəsi zəruridir.

Sərgiyə yeni hazırlanmış heykəllər, rəsm əsərləri və film daxildir.

Daha əvvəl Azərbaycanı 53-cü və 55-ci Venesiya Biennalesində – Beynəlxalq İncəsənət Sərgisində təmsil edən Fərid Rəsulov həm Azərbaycan, həm də daha geniş Şərq ənənələrinə həsr olunmuş əsərləri ilə məşhurdur. O, rəssamlıq, instalyasiya, animasiya, heykəltəraşlıq və 3D qrafikası da daxil olmaqla müxtəlif vasitələrlə işləyir və əsrlər boyu dəyişməyən bu ənənələrə xas olan idealların doğruluğunu əks etdirən xalq sənətkarlığı və mərasimlərindən ilham alır.

Fərid Rəsulov “YARAT”da nümayiş ediləcək öz sərgisi üçün başlanğıc nöqtəsini müsəlmanların əsas bayramı sayılan Qurban bayramından götürür. İbrahim Peyğəmbərin öz oğlunu Allaha qurban verməyə hazır olduğunun rəmzi olaraq, qurbanlıq heyvan ənənəvi olaraq qohumlar, qurban kəsənin öz ailəsi və ehtiyacı olanlar arasında bölüşdürülür. Lakin son zamanlar bu paylaşmaq ənənəsi status və sərvət göstəricisinə çevrilmişdir. Fərid Rəsulov “Yuxuların yuxusu” adlı yeni filmində xəstəxana palatasında canlandırılan dramatik və eyni zamanda gülməli süjet yaradır. Filmdə iki həkimin bayram münasibətilə paltar geyindirilmiş bir qoyunu parçalayarkən, üzərindəki çoxlu zinət əşyalarını onun bağırsaqları ilə qarışdıraraq söhbət etdiklərini görmək olar, eyni zamanda həm olduqca məzəli, həm də istehzalı olan səhnə bu mərasimlə əlaqələndirilən absurd maddiyyatçılığa diqqəti çəkir. /azertag.az/

• Corc Eliota çevrilən Marian Evans - O, hansı məşhur filosofdan təsirlənmişdi?
• Luvr muzeyinin 400 əməkdaşı tətil elan etdi: İşçilər nədən narazıdır?
• Dünyanın ən məşhur restavrasiya səhvi ilə tarixə düşən qadın vəfat etdi