“Biz başqa xalqlara nəzərən bir qədər duyğulu, istiqanlı xalqıq, duyğularımızı başqalarına nisbətdə daha çox büruzə verməyi xoşlayırıq”.

Bunu APA-ya açıqlamasında Xalq artisti Zülfiyyə Xanbabayeva deyib.

O bildirib ki, bizdə bu xüsusiyyətimizdən qaynaqlanan sanki bir çəkingənlik də var: “Həmişə qanımız qaynayır deyə, görüşəndə sarılmağı, qucaqlaşıb öpüşməyi kənara qoya bilmirik. Biz də belə xalqıq. Nə edək? Bu gün, bu pandemiya dövründə bu xasiyyətimizi birdən-birə dəyişdirmək əlbəttə bizə çətin gəlir. Amma nə edək? Qoyulan qaydalara mütləq əməl etməliyik. Dəfələrlə bu barədə demişəm, çünki bizim övladlarımız, gələcəyimiz var. Yaxşı, deyək ki, boş şeydir, inanmırıq, buna görə də özümüzü qorumuruq. Amma biz tək deyilik axı. Əgər özümüzü nəzərə almırıqsa, gələcəyimizi nəzərə alaq. Axı biz övladlarımız üçün canımızdan keçməyə hazır olan xalqıq. Niyə görə əhli-keflik edirik?”

Xalq artisti yay fəsli ilə əlaqədar insanların bayıra çıxmaq, dənizə, sərin bölgələrə getmək istəklərini anladığını da vurğulayıb: “Amma heç olmasa, duyğularımızı bir balaca kənara qoyaq, səbrlə hərəkət edək ki, xəstələnməyək. Mən hardasa məcbur qalıb qaydaları pozanları başa düşürəm, məcbur olub evinə bir parça çörək aparmaq üçün çölə çıxanları demirəm, bəs məcbur olmayanlar niyə bunu edir, qaydaları pozurlar? Elə ailələr var ki, məhrumiyyətlərə baxmayaraq, hər şeyə dözür, səbr edir. Elələri də var ki, evində hər şəraiti var, bununla belə, qaydaları yenə pozurlar. Biz artıq böyüməliyik, uşaq kimi özümüzü aparmayaq. Heç olmasa, ciddiləşək. Bəziləri arada zarafata salırlar, düzdür, zarafatsız da keçinmək olmur, bunu da başa düşürəm, amma unutmayaq ki, bu ciddi xəstəlikdir, zarafatın da öz yeri var, ciddi yanaşmalı, özümüzü qorumalıyıq”.

Z. Xanbabayeva insanlardan səbrli olmağı rica edib: “Mən xalqımızdan tələb edə bilmərəm, yalnız rica edərəm. Xalq artisti, müğənni, tanınmış bir adam kimi yox, bu xalqın bir nümayəndəsi kimi xahiş edirəm, özünüzü qoruyun, nə qədər bacarırsınız özünüzü qoruyun ki, sabah peşmanlıq olmasın. Bəzən məndən soruşurlar, sən səbr edirsən? Əlbəttə, edirəm. Düzdür, darıxdığım zamanlar da olur. Məsələn, təyyarəyə minmək üçün çox darıxıram. Mən təyyarəni çox sevirəm. Amma indi nə edək? Əgər bütün dünya buna dözürsə, biz də dözək, özümüzə səbr aşılayaq, qoyulan qaydaları qulaqardına vurmayaq. Hər gün nə qədər yoluxma olur. Cahillik, savadsızlıq etməyək, anlayaq ki, nəinki biz, bütün dünya ciddi bir təhlükə ilə üz-üzədir. Səbir edin, məsafə saxlayın, evdə qalın, maska taxın. Başa düşürəm bunları demək asandı, lakin əməl etmək, xüsusən yayda əməl etmək çox çətindir. Amma inanıram ki, bu bəladan üzüağ, alnıaçıq çıxarıq. Mən yenə deyirəm, biz istiqanlı xalqıq, görüşəndə sarılmağı, öpüşməyi sevən xalqıq. Hələlik bunları bir kənara qoyaq, səbrimizi basaq. İnşallah o gün də gələcək, bir-birimizi sarılacağıq, bağrımıza basacağıq. Bu gün isə sosial məsafə saxlayaq, maska taxaq ki, o gözəl günlərə salamat çıxa bilək”.

• Kanoe - Vüsal Bağırlının essesi
• Niderlandın "Avroviziya 2027" ilə bağlı qərarında dəyişiklik edildi
• Elnarə Akimova: "Azərbaycan heç bir dövlətin dini-siyasi təsir dairəsi deyil"