"Biz böyük bir təhlükə ilə rastlaşmışıq. Bundan öncə xalqımız da, heç kəs də bilmirdi ki, zaman gələcək, sanki Üçüncü Dünya Müharibəsi kimi bir fəlakətlə qarşı-qarşıya qalacağıq”.

Bunu APA-ya açıqlamasında Xalq artisti Xuraman Qasımova deyib.

O, vətəndaşları qoyulan qaydalara əməl etməyə çağırıb: “Mən istəyirəm ki, xalqımız bir qədər düşünsün və bunun nə dərəcədə təhlükəli olduğunu dərk etsin. Bu təhlükədən sıyrılmaq üçün isə bütün qayda-qanunlara riayət etməliyik. Çünki panika panika doğurur, başqa xəstəliklər yaradır. Qaydalara uyğun hərəkət etmək lazımdır. Xalqımız özünü qorumalıdır”.

X. Qasımova Nazirlər Kabineti yanında Operativ Qərargahın qərarlarına insanların çoxunun əhli-kef yanaşdığını diqqətə çatdırıb: “Amma məsələ çox ciddidir. Əlbəttə, yayda havasız qalmaq heç də asan deyil. Bunu nəzərə almaq lazımdır. Çünki yaşlı insanlara təmiz hava lazımdır, yaxud körpə uşaqları yay vaxtı evdə necə saxlayasan? Eyni zamanda da sərt cəzalar var. Mənə belə gəlir ki, insanlar onsuz da çətin vəziyyətdə yaşayırlar. Ehtiyacı olan ailələr nəzərə alınmalıdır. Bunlar çox ətraflı, çox düşünməli problemdir. Digər tərəfdən, əlbəttə, ağıllı mütəxəssislər var ki, bunu düşünərək edirlər. Bəs o zaman özümüzü necə qoruyaq? Yalnız evdə qalmaqla. Nə qədər çox evdə qalsaq, hava təmizlənər, maşınlar yollara az çıxar, tıxaclar olmaz, insanlar bağlarına, yaxud rayonlara gedər, şəhərdə əhali azalar, şəhərin havası da təmizlənər”.

Xalq artisti cərimələrin artırılması məsələsinə də toxunub: “Bu cərimələr nə dərəcədə düzgündür deyə bilmərəm. Ancaq insanlar özləri başa düşməlidirlər ki, bu, təhlükədir, böyük təhlükədir. Bu təhlükə ilə mübarizədə həkimlərimizin üzərinə böyük yük düşür. Onların da sayı çox deyil axı. Həkimlər də insandırlar, xəstələnirlər. Bunların hamısını başa düşmək lazımdır. Əgər bizim Prezidentimiz maska taxırsa, əhalimiz niyə taxmasın? Hamı lazım olan yerlərdə maska taxsın, özü və yaxınları üçün təhlükə yaratmasın”.

• "Sözlərə bürünəcəyəm ala-bəzək otlar kimi..." - Alfred Tennison
• Tutanxamon və Nefertitinin süni intellektlə çəkilən rəsmi Qahirədə qalmaqal yaratdı
• Ruzbeh Məmmədin yeni kitabı çap olundu